A tawpah world number 1 Vs world number 2
Australian Open final chu Pathianni chawhnu dar 2:00 hian Rod Laver Arena, Melbourne Park-ah khelh a ni dawn; World number 1 Novak Djokovic hmaa ding turin nimin tlai khan world number 2 Andy Murray chuan inkhel inhnehtawk takah Milos Raonic a hneh.
Melbourne-a semifinal inkhelah Murray hian bul a ṭan fuh lo a, service hmasa zawkah ṭang mah se a service a hloh nghal. Amaherawhchu, darkar li zet an inbeih hnuah Murray hian 4-6, 7-5, 6-7, 6-4, 6-2 in hnehna a chang a ni.
Canada star feet 6 leh inch 5 ngawta sang Raonic-a'n a service ṭhat chhawr ṭangkaiin vawi 29 ngawt ace siam thei mah se Murray lakah a dingchang zo lo.
Kum 28-a upa Murray chuan, "Inkhel hautak tak a ni a, a bik takin set thumna kha a harsa hle a ni. Ka tumruhna leh thawhrimna vangin hnehna ka chang," a ti.
Murray chuan final an khelh tur thlir nghalin, "Novak hian he hmuna inkhelh hi nuam a tiin a khel ṭha ṭhin hle a, tun hma pawn ka hneh lo tawh ṭhin. Tun dinhmuna khawvela ṭha ber nen kan inhmachhawn leh dawn a ni a, result duhawm zawk ka hlawh chhuah ve tawh ngei ka beisei," a ti.
Final thlirna
Seeded pahnihna Murray hian tum ṭum hi Australian Open final a khelh vawi ngana tur a ni a, a vawi khat nan champion nomawi chawi in beisei ve tawh mah se a hma a ding tur hi a hneh loh ṭhan Djokovic a nih avangin a hna hi a harsa dawn.
Ningani tlai khan semifinal hmasa zawk khelh a ni tawh a, seeded pakhatna Djokovic chuan 6-1, 6-2, 3-6, 6-3 in seeded pathumna Roger Federer a lo hneh tawh a ni.
Australian Open-a champion hnem ber chu world number 1 pawh lo ni tawh ṭhin Roy Stanley Emerson a ni a, vawi ruk a champion. Tun ṭumah hian Djokovic hi a champion thei a nih chuan Emerson record hi a nihrual chiah dawn a ni.
Djokovic a chungnung
Serbian thiampuipa leh Britain fachuam Murray te hi Australian Open final-ah kum 2011 leh 2013 te khan an lo inhmachhawn tawh a, hengah hian Djokovic-a'n hnehna a chang.
Tournament hrang hrangah player pahnihte hi vawi 30 an lo inhmachhawn tawh a, Djokovic hian vawi 21 hnehna chang tawhin vawi kua a tlawm thung. An inthawn hnuhnung vawi 11 aṭangin vawi 10 ngawt hnehna a chang thei a ni.
Inkhel Thlirna Tawi
Raonic Stats Murray
23 Aces 9
72 Winners 38
78 Unforced errors 28
149 Total points won 169