Europa League Man United-in semifinal an lut hram

Manchester United-in Europa League quarterfinal-a FC Copenhagen hneh turin extra time an khelh a ngai. Thawhṭanni zan Cologne-a inkhelah hun pangngaiah goal a lut lo a, extra time minute 95-naa Bruno Fernandes-a penalty hmangin Man United 1-0 in an chak.

Ole Gunnar Solskjaer hote hi August 16, Pathianni zanah nizana Wolverhampton Wanderers leh Sevilla inkhela chak zawk nen an inhmachhawn ang.

Manchester United-in inhliam vangin Europa League squad-ah Luke Shaw leh Axel Tuanzebe te an telh lo a, player dang zawng chu chhawr theih vek an ni. Copenhagen hmachhawn turin David de Gea aiah Sergio Romero thlan a ni a, Argentine keeper hi United-in kum 2017-a Europa League nomawi an chawi ṭum pawhin rinrawl a ni. 

Norwegian manager Solskjaer-a'n captain Harry Maguire kawppui turin Victor Lindelof aiah Eric Bailly a thlang a, midfield aṭanga tlarhnung pui turin Nemanja Matic aiah Fred a thlang bawk. Starting eleven dang erawh Premier League tawp lama hman ṭhat vek an ni a, goal nawr turin Marcus Rashford, Anthony Martial leh Mason Greenwood an awm bakah midfielder ṭha pahnih Paul Pogba leh Bruno Fernandes ten bul an ṭan bawk.

Copenhagen coach Stale Solbakken erawhin Turkish champion Istanbul Basaksehir 3-0 a sawptute aṭangin player pahnih a thlak a, Robert Mudrazija leh Mikkel Kaufmann aiah Jens Stage leh Mohammed Daramy te a luhtir thung.

Manchester United-in quarterfinal-a Copenhagen an chang hi an vanneia ngaih ni mah se khelmualah erawh chak lo thei dinhmunah an ding. Danish club-in bul an ṭan ṭha zawk a, minute 15-na leka left back Nicolai Boilesen inhliam vanga an chan chung pawhin an talbuai phah lo.

Fred-a telna United midfield-in inkhel an thunun thei lo a, goal hmaah Copenhagen an hlauhawm zawk. United defender Bailly leh Brandon Williams ten goalline bul aṭangin ball an 'clear' ve ve a, Solskjaer-a hoten freekick hmangin chance insiam mah se Fernandes leh Rashford nen goal hlauhawmah an chhuah lo. United-in beisei an pha lo a, chutihrualin khaw lum an chhuanlam thei ang. Inkhel ṭan hun hi anmahni huna zan dar 9:00 a ni a, 32C zet a nih avangin English club tan chuan buaipui tham a tling.

Chutihrualin first half-ah United an vanduai, penalty hlawhchhuak mah se offside vangin VAR hmanga sut a ni a, Mason Greenwood-a goal khung pawh offside vang bawkin VAR hmangin pawm a ni lo. Second half ṭantirh lamah Greenwood-a goal ban pet per chu Rashford-a'n khung mah se offside vangin pawm a ni lo a, Solskjaer hote hi an khel ṭha lo nachungin vanneih ṭum chu nise goal khung thei tur an ni. Amaherawhchu an khung miau loh avangin Copenhagen-in beiseina an neih phah a, English club hi chak lo thei dinhmunah an ding.

Quarterfinal hi single leg-a khelh a nih avangin boruak a sang a, team ṭha zawk United-in pressure an ngah. Copenahagen midfielder Ramus Falk-a'n mawi zetin Williams a bum a, Jonas Wind pein Danish forward hian substitute Bryan Oviedo tan ball ṭha bik a pe, Everton leh Sunderland midfielder hlui ball pet hi Wan-Bissaka-a'n a dang hlauh.

Hun tawp lamah erawh team ṭha zawk danglamna a lang a, United-in goal chance an ngah ta zawk. Bruno Fernandes-a'n goal ban a pet per a, keeper  Karl-Johan Johnsson dan turin ṭha zetin a pet. Swedish keeper Johnsson hian Copenhagen beiseina a siamsak a, United ball pet vawi 13 zet a dang a, heng zinga pasarih hi box chhung aṭanga an pet a ni.

Kum 30 mi Johnsson hi Rangers tan pawh a khel tawh a, tun season Europa League-ah shot vawi 42 hmachhawnin vawi 37 a dang. United nen pawh hian Anthony Martial-a goal khung tur a kut khing khatin a dang hman a, chak zo ta lo mah se a khelh ṭhat avangin club lian zawkin an en zui 

ngei ang.

Manchester United-in tun season-ah a vawi 21 nan penalty an hlawh chhuak a, Europe-a inelna sang panga zingah penalty hmu ngun ber club an ni. Copenhagen nen hian Martial-a'n penalty a hlawh chhuak a, minute 95-naah Fernandes-a'n penalty hi a khung. Portuguese midfielder hian penalty a pet hma hian a zuang keuh ṭhin a, Copenhagen nen erawh keeper Johnsson bum nan a zuang lo!

Ole Gunnar Solskjaer chuan, "Keeper-in a zuan hun an nghak dawn tih a hria a, chuvangin pet dan chi hnih hi a zir hrim hrim. Kei aiin penalty pet a thiam zawk," tiin inkhelh banah fiamthu pahin Fernandes a fak. Portuguese midfielder hian United leh Sporting Lisbon tan a zawnin penalty vawi 21 a khung tawh a, season li leh a chanve chhung chu penalty a hlah tawh lo.

Man United-in Copenhagen hneh turin extra time leh penalty an mamawh a, chutihrualin an champion hnuhnun ber ṭum pawhin semifinal thleng turin extra time leh penalty an mamawh. Kum 2017 khan United-in Jose Mourinho kaihhruaina hnuaiah Anderlecht nen minute 180 chhungin 2-2 in an inhnehtawk a, extra time-a Marcus Rashford hmangin an chak hram.

United manager Ole Gunnar Solskjaer chuan, "Tun season-a semifinal vawi thum kan thlenna a ni a, ka lawm hle. Chak kan phuin ka hria - kan khingpui keeper a khel ṭha a, VAR thutlukna kan lamah a la ṭang lo a, Sergio Romero-a'n dan tur a nei lo," tiin a sawi. Copenhagen hian goal khung theihna hun ṭha nei mah se keeper Romero dan turin an pet lo a, 'shot on target' an nei lo!

Manchester United hi Premier League-ah pathumna an ni a, FA Cup leh League Cup-ah semifinal thleng mah se Chelsea leh Manchester City lakah an chak lo. Solskjaer hoten Europa League-ah semifinal an thleng leh a, match hnih an chak leh theih chuan nomawi nen season an khar ang.