Everton rum thaihna paltlangtu City

Captital One semifinal hnu-hnung zawkah Manchester City-in Everton lakah inlehthalna ropui an lantir a, Argentine forward Sergio Aguero goal hmangin final an lut. Manuel Pellegrini hote hian February 28 khian Liverpool nen Wembley Stadium-ah final an khel ang.

Goodison Park-a 2-1 a chak Ever-ton-in Etihad Stadium-ah goal an khung hmasa zawk. Minute 18-na lekah Ross Bark-ley-a'n mimal thiamna a lantir a, yard 20 aṭangin goal ropui a khung. Toffees-in Wembley Stadium an thleng mai dawna a lan laiin Citizen-in Fernandinho, Kevin de Bruyne leh Aguero te hmangin an chhang let.

Second leg-ah City 3-1 in an chak a, first leg inkhel result nena belhkhawmin Pellegrini hote hi 4-3 in an chak. League Cup final-ah Merseyside Derby a hmuh theih dawn lo a, amaherawhchu player nei ṭha zawk an chak avangin Jurgen Klopp-a enkawl Liverpool tan nomawi ban phak maiah a awm ta lo.

Inlehthalna

Toffees-in goal an khung chiah khan extra time ngai loa final lut nghal turin City-in minute 72 chhungin goal thum khung an mamawh.

Player man to danglamna a lang chhungzawm a, minute 24-naa Aguero ball pet chu Everton defender-in dang mah se Fernandinho-a'n goal-ah a pet leh nghal zat a, Leighton Baines-a'n Brazilian midfielder ball pet hi a dan per avangin keeper Joel Robles tan dan theih a ni lo.

Minute 70-naah player man to danglamna kan hmu leh a, pound maktaduai 49 man Raheem Sterling-a pass chu pound mak-taduai 55 man Kevin de Bruyne-a'n chiang zetin a khung. Goal class tak ni mah se Liverpool pla-yer hluiin Belgian midfielder a pass hma hian ball-in line a pelh hman avangin sawi zui a hlawh hle.

Minute 76-naah City tan for-ward Aguero-a'n sawisel theih miah loin ding lam aṭanga De Bryune-a cross chu a tauh lut. Feet 5 leh 8 in leka sang Argentine forward hian feet ruk chuanga sang defender venna karah ṭha zetin a tauh lut - Aguero-a'n pum-raw lenna aiin thiamna a pawimawh tih a lantir nawn leh bawk.

Vanduaina

Everton manager Roberto Mar-tinez chuan, "Replay hmu zawng zawng chuan City goal hnihna kha a out tih an hmu thei vek ang. Football hmuhnawm tak kan khel a, amaherawhchu kan goal chhuah dan kha hriatthiam a har a ni. Referee-in hna hahthlak tak an thawk a, an hnathawh kan zah sak a ngai a, chutihrualin tun ang hun tawhah chuan khatiang kha chu hmuh hmaih chi a ni lo," tiin referee thutlukna dik lo chu an chak lohna chhan bul pui ber a nih thu a sawi.

Toffees boss chuan City fak zuiin, "City hi team ṭha tak an ni a, goal thum hmanga an chhang let a nih pawhin kan pawm mai tur a ni. Ka player-te hi naupang tak tak an ni hlawm a, City laka
ṭha taka kan khel hi phur lehzualna atan kan hmang zawk tur a ni," a ti.

Chak thei dinhmuna ding Everton an vanneih zan a ni lo a, first half tawp lama Gerard Deulofeu hlah te chhiar tel phei chuan an vanduai lehzual. Chutihrualin City chhandamtu Aguero-a'n goal ban a pet per a, Spanish midfielder David Silva-a'n goal ban a tauh per tih hriat a tel a ṭul bawk.

Lawm a kim lo

Bench aṭanga City game thlaktu De Bryune chu injury time-ah a inhliam a, a nat dan chiah a chiang la lo. City ma-nager Manuel Pellegrini chuan, "A êng zawngin ka thlir a, tun season tluan a inhliam loh ka beisei. Doctor-te chuan a khup hliam hi a ngaihtuah awm turah an ngai a, an rin dan ang hi chiang zawka kan enfiah hunah dik lo se ka ti hle," tiin a sawi.

De Bruyne-a inhliam dan chiah hian Belgium tana a khelhpui Jan Vertonghen chu kar liam ta khan a inhliam a, season ṭantirh khan hetiang bawk hian Chelsea goalkeeper Thibaut Courtois chu inhliamin thla thum chhung a lo chawl tawh bawk.

Result chungchang sawiin Pellegrini chuan, "Wembley ka thleng thei hi ka lawm a, kan tan chuan final thlen hi a pawimawh a ni. An goal khungna hmasa ber luh hma khan foul a awm tawh a, kan chak chhan kha goal hnihna vang chauh a ni lo. Kan chak chhan chu goal thum kan khung a, Everton-in goal khat chauh an khung vang a ni," tiin referee vanga chak an nih loh thu a sawi.