Teixeira-a'n Anfield pan a duh

Liverpool-in tun hnai-a lakluh tuma an dawr Shakhtar Donetsk forward Alex Teixeira chuan Merseyside club chu zawm thuai a duh thu a sawi.

Reds hian Brazilian midfielder hi pound mak-taduai 24.5 vela lakluh an tum a, Ukrainian club lam hian pound maktaduai 39 an phut avangin club pahnih hi an in dawr fel lawk thei lo.

Kum 26-a upa Tei-xeira chuan, "Liverpool hi club lian tak an ni a, player ropui tak takin he club tan hian an lo khel tawh ṭhin a ni," tiin Liverpool chu club ropui tak a nih thu a sawi.

Tun season Ukrainian League-a match 15 a inlana goal 22 khung tawh midfielder chuan, "Liverpool tana khelh hi ka duh a ni. Mahse, engkim hi kan club president kutah a awm a, nghakhlel taka lo thlir mai hi ka tih theih awmchhun chu a ni," a ti.

Teixeira chuan a Brazilian pui Philippe Coutinho, Lucas leh Roberto Firmino-te nena khelhho a chak thu sawiin, "Coutinho nen hian kum sawm mi lek kan nih laiin kan khel dun ṭhin a, kan khel dun leh thei a nih chuan a nuam ngawt ang. Goal khung tuma khel reng chi ka ni a, Liverpool-a an player ṭha tak takte nen kan inkawp chuan goal tam zawk ka khung theih pawh ka ring a ni," tiin Anfield-ah a hlawhtlin theih a inbeisei.