Mumbai khawpuiah Bengaluru an tlawm

Bengaluru FC-in I League-a an chak record an chhawm nung thei lo a, Nilaini zan khan Mumbai FC lakah 2-0 in an tlawm. Bangalore club tan I League match li an khelha an vawi khat tlawmna a ni a, Mumbai FC-in inkhel an hmachhawn vawi liah tlawm hmel an la hmu lo thung.

Cooperage Ground, Mumbai-a inkhelah mualneitu team-in goal an khung hma a, inkhel ṭan aṭanga minute ngana lekah Arata Izumi chuan Bengaluru tlarhnung talbuai karah a khung.

Minute ruk hnuah Mumbai-in goal an khung leh nghal a, North Korean defender Minchol Son-a'n tlu chungin Bengaluru ball hloh a pet a, yard 40 a hla aṭangin a pet goal. Mizo keeper Lalthuammawia Ralte tan dan theih niin lang mah se Champhai tlangval chet ṭhat zan a ni lo.

Second half-ah Ashley Westwood-a enkawl Bengaluru-in theihtawp chhuahin nawr mah se goal an khung thei lo a, an mikhualna ramah a tlawm zawka an ṭan a ngai ta a ni.

Bengaluru tan Thuammawia bakah Lengpui tlangval Lalchhuanmawia Ralte chuan inkhel bul a ṭan a, second half-ah hliam vanga lakchhuah Eugeneson Lyngdoh thlak turin Chaltlang rawlthar duhawm Malsawmzuala chu khelmual chhungah a tlan lut bawk.