Novak Djokovic 23 - 22 Roger Federer

World number 1 Novak Djokovic chuan world number 3 Roger Federer hnehin Australian Open final a lut. Serbian thiam­puipa hian Swiss star lakah hian vawi 23 hnehna a channa chiah a ni a, an chak tam zawkna hi vawi khat chiah a ni.

Nimin tlai khan Rod Laver Arena-ah seeded pakhatna Djokovic hian set hmasa pahnihah game thum chiah a hloh a, set thumna chân mah se set hnuhnung berah Federer-a service vawi khat chhuhsak lehin darkar hnih leh minute 19 chhungin 6-1, 6-2, 3-6, 6-3 in hnehna a chang.

Fourth round-a Gilles Simon nen an inhmachhawn tuma vawi 100 ngawt unforced error neitu Djokovic hian set hmasa pahnihah hian vawi ruk chiah unforced error a nei a, inkhelh chhung zawngin vawi 20 chiah a nei.

Australian Open vawi nga champion tawh Djokovic hian tun hnai kum sarih chhunga a vawi ruk nan final a in hlangkai. Hetihlai hian Basel tlangval Federer erawh tun hnai kum ruk chhunga a vawi nga nan semifinal-ah a tla ta thung a ni.

Grand Slam vawi 17 champion tawh kum 34-a upa Federer hi tunlaia player ṭha berte zinga mi la ni mah se kum 2012-a Wimbledon title a chawi hnuah Grand Slam inelnaah a la champion leh lo.

Kum 28-a upa Djokovic chuan, "Set hmasa pahnihah khan beisei phak bakin ka khel ṭha a, mah se set thumnaah kha chuan Federer khan min nawr nat em avangin point ka hloh nasa hle. Player ṭha hneh tur chuan kan hlauhthawnna aiin kan inrintawkna a len zawk a ṭul. Tun ṭum inelnaa kan inhmachhawn hmain Federer hian set khat chiah a la hloh avangin hneh tur chuan beisei phak baka ka khelh kha a ngai reng a ni," a ti.

Nikum US Open khelh ṭan
aṭang khan Djokovic hi hneh theih loh tluk hial a la ni rih a, match 38 a khelh aṭangin vawi khat chiah a tlawm. ATP World Tour Finals round robin stage-ah Federer a hneh lo, mah se he inelnaah pawh hian a champion zui tho.

Vawiin chawhnu dar 2:00 hian semifinal hnuhnung zawk khelh a ni dawn a, world number 2 Andy Murray leh Milos Raonic te an inhmachhawn dawn a ni.