Copa del Rey Barcelona-in semifinal an lut; Atletico an tla

Tun season-a champion nomawi panga chawi inbeisei Barcelona-in an beiseina an chhem nung zel. Catalan club hian Nilaini zan khan Copa del Rey quarterfinal-ah Athletic Bilbao chu 3-1 a hnehin semi-final an lut.

Barcelona hian tun season La Liga-a hma an hruai bakah Spanish Cup leh Champions League-ah champion nomawi beiseina an la nei a, UEFA Super Cup leh FIFA Club World Cup nomawi an chawi tawh bawk.

Spanish Cup quarterfinal first leg-ah Barcelona hian 2-1 a hnehna an lo chan tawh bawk avangin inkhel pahnih belhkhawmah Barcelona hi 5-2 in an chungnung zawk a ni.

Nilani zana Copa del Rey quarterfinal inkhel dangah Atletico Madrid-in an beisei loh result an hmu thung a, Celta Vigo lakah 3-2 in an tlawm. Team pahnih hi inkhel hmasa zawkah goal khung loa an inhnehtawk tawh avangin Celta Vigo hi tlang zawkah an ṭang.

Barca chakna Suarez

Nou Camp-a inkhelah beisei loh zawk mikhual team-in goal an khung hmasa a, Inaki Williams chuan minute 12-naah Athletic Bilbao tan goal a khung. First half-ah goal dang lut loin chawlhlawk hman a ni.

Second half-ah Barcelona tak tak an inlar ṭan a, minute 53-naah Luis Suarez chuan Catalan club tan an si phurh a sut. Barcelona tan Gerard Pique leh Neymar-te'n khung chhunzawm ve lehin inkhel tawpah team ṭha zawk an chungnung.

Barcelona tana an si phurh sutna goal khungtu Luis Suarez chuan, "Inkhel hmasa zawka chak zawk nichungin inkhel kan hmachhawn a, goal kan chhuah takah kha chuan kan talbuai ṭep a ni. First half kha kan khel chhe takzet a, mahse kan insiamṭha leh thei hram a ni. Athletic khan an khel ṭha takzet a, kan buai hman hle a ni," tiin an talbuai hman thu a pha lo.

Atletico an tla

Kum 2013 Spanish Cup champion Atletico Madrid-in an khelmualah chak hmel an hmu zo lo a, team ṭha lo zawk nia ngaih lakah an mualpho.

Mikhual team tan Pablo Hernandez-a'n goal hmahruai a khung hnuah Antoine Griezmann-a'n si phurh sutna goal khung mah se Celta Vigo-in Manchester City striker hlui John Guidetti leh Hernandez-a goal hnihna hmangin an chhanglet leh a, Atletico tana hun tawp hnaih lama Angel Correa-a goal khungin awmzia a nei thui lo.