Bruce Arena-a'n Cole a beisei sang

LA Galaxy head coach Bruce Arena chuan an player thar Ashley Cole chu an ṭhatpui ngei a beisei thu a sawi.

Kum 35-a upa Cole hian season hmasa kha Italian Club AS Roma tan a khel a, match 16 chiah a inlan. Season thar aṭang chuan England tana a lo khelhpui tawh Steven Gerrard bulah a khel ve leh thung tawh dawn a ni.

A player thar chungchang sawiin Arena chuan, "Tun hnai thla hnih thum chhunga kan inbiakna aṭangin Cole hian Los Angeles-a inkhelh hi a duh tak tak tih ka hre thei a, football-ah tawnhriat a ngah tawh em avangin Major League Soccer-ah pawh hian harsatna a neih ka ring lo. A hrilsena a ṭhat bakah a la in fit em avangin kan league-ah hian left-back ṭha ber pawl a la ni thei ang," a ti.

Arsenal leh Chelsea tan pawha lo khel tawh Cole hian Premier League title pathum, FA Cup nomawi pasarih a chawi tawh bakah bakah Champions League leh Europa League-ah te a champion tawh bawk a ni.