Coppa Italia Juventus dinhmun a ṭha nghal

Nilaini zan khan Coppa Italia semifinal hnuhnung zawk first leg khelh a ni a, champion lai Juventus chuan 3-0 in Inter Milan an hneh.

Turin club hian tun hmain Coppa Italia semifinal first leg-a hnehna an chan tawh chuan final an lut ziah a, hetiang deuh tho hian Inter hian an match hmasa zawka an chak lo a nih chuan an khingpuite an lehthal ngai tawh lo thung.

Mualneitu Juve tan Real Madrid forward hlui Alvaro Morata chuan goal hnih a khung a, substitute Paulo Dybala chuan hun tawp dawnah an goal thumna a khung bawk.

Inter an khel ṭha lo a, Jeison Murillo chuan Juan Cuadrado a tiltluk avangin minute 36-naah penalty a chawi a, second half mi-nute 70-naah yellow card vawi hnih hmuh vangin hnawhchhuah a ni bawk.

Juve manager Massimiliano Allegri chuan, "Tun dinhmunah chuan Juve boruak hi a ṭhain a nuam hle. Kan tlarhma ten goal an khung theih laiin kan tlarhnung pawh fak phu khawpin an khel ṭha a, hmasawnna tur lai chu la ni mah ila kan khel ṭha thawkhat viau," tiin a naute khelh danah a lungawi hle.

Inter manager Roberto Mancini chuan, "Juve khan hnehna chan phu khawpin an khel a, mahse 3-0 em em lo deuh kha chu a ni tur a ni. Kan tlarhnung a phui loh avangin kan buaia, lehthal leh tum chu thil harsa tak a ni dawn tih hre mah ila kan beidawng bik rih lo ang," a ti.

March 2 khian Inter khelmual San Siro Stadium-ah second leg khelh tur a ni ang. Semifinal hmasa zawkah AC Milan chuan third division club Alessandria chu Mario Balotelli goal khat khung hmangin an lo hneh tawh bawk.