Aus Open hnu khar tur Serena leh Kerber
Nimin khan Australian Open hmeichhe single semi-final match hnih khelh a ni a, seeded pakhatna Serena Williams leh seeded pasarihna Angelique Kerber te chuan final an inhlangkai.
Serena nge nge
Rod Laver Arena-ah world number 1 Serena chuan a champion nomawi humhim ngei tumin seeded palina Agnieszka Radwanska lakah a chungnun zia a pholang leh a, set khat naah game khatmah a hloh lo. Darkar khat leh minute li chhungin 6-0, 6-4 in hnehna a chang thei a ni.
Tun hnaiah Radwanska a khel ṭha tluang hle a, a zawnin match 13 chhung hnehna a chang tawh. Mahse Serena lakah erawh a zawr chiang hle thung. Williams hian Grand Slam inelnaah a vawi 26 nan final a lut a, major tournament-ah hian vawi 21 a champion tawh a ni.
Australian Open vawi ruk champion tawh Williams chuan, "Final ka luh avangin ka lawm tak zet a, Radwanska lakah khan ka tennis khelh tawha zawnga ka khelh ṭhat ber ṭum angin ka khel chhuak a ni," tiin a sawi.
Radwanska chuan a hneh loh American star Williams chungchang sawiin,"Khatiang em em khan Serena hi a thiam tih ka la hre ngai lo, ani ang kha chuan tumahin an khel chhuak thei lo ang. Hmeichhe player zingah chuan a chungnung bik hle," a ti.
A vawi khat nan Kerber
German star Kerber hian WTA title pasarih la ve tawh mah se tun hmain Grand Slam inelnaah hnuhma a la nei ṭha lem lo a, tun ṭum hi final a luh vawi khatna chiah a ni.
Semifinal hnuhung zawkah hian darkar khat leh minute 22 chhungin Kerber hian Konta lakah 7-5, 6-2 in hnehna a chang. Kum 33 chhunga a vawi khat nan Konta hi British hmeichhe zinga Australian Open semifinal thleng thei awm chhun ni mah se a hmawr a bawk thei dawn ta lo a ni.
Kum 28-a upa Kerber chuan, "Final luh ngei tumin court chhungah khan ka theihna zawng zawngin ka khel a, a vawi khat nana dai ngai loh ram ka dai tur hi ka lawm hle. World number 1 nen kan inhmachhawn dawn a ni a, thil dang ngaihtuah hman ka ni tawh lo, ka tha tawpa ka ṭan leh a ngai dawn," tiin a sawi.
Australian Open-ah hian German hmeichhia ten final an luh lohna a rei tawh hle. Kum 1996-a Anke Huber-i'n final a khelh hnua a dinhmun ang luah leh thei hmasa ber chu Kerber hi a ni.