Chelsea-ah Pato a lut dawn

Tun hnaia Chelsea nena sawizawm hlawh tak Brazilian striker Alexan-dre Pato chuan Nilainia London khawpui a luh hnuah, "Chelsea chu ka in thar a ni ta," tiin a sawi a, AC Milan striker hlui hian London club hi a zawm ngei dawn niin a lang ta.

Kum 26-a upa striker hian season tawp thleng Premier League club hi loan-in a zawm ang a, a khelh ṭhat dan a zirin pound maktaduai 7 velin Blues hian an la lut thei dawn a ni. Pato transfer chungchangah hian Chelsea erawh an la ṭawng chhuak lo thung.

Brazil tan vawi 25 inlana goal 10 khungtu striker chuan, "Inkhelh ka mamawh a, Chelsea tana ka inlan tur hi ka phurin ka hlim takzet a ni," a ti.

Heathrow Airport, London-a thuthar theh-darhtute hnenah Pato chuan, "Min thlawpna leh min ṭawiawmna avangin Chelsea hnenah lawmthu ka sawi a, ka fan-te chungah pawh lawmthu ka sawi duh a ni. Ka ṭhian thar turte leh kan team chhungkua hmelhriat vat vat ka chak tawh hle a ni," tiin London club a zawm tur chu a phur hle.

Pato hian kum 17 leka upa a nih laiin AC Milan a zawm a, khawvela rawlthar beiseiawm ber pawl a ni ṭhin. Mahse hliamin a tihbuai reng avangin beisei a phak lo chhunzawm a, Milan tana Serie A-a a inlan hnu-hnung match 21-ah goal khat chiah a khung a ni.

Hetihlai hian Chelsea midfielder Ramires chuan Chinese Super League club Jiangsu Suning a zawm ta a, Brazilian mid-fielder man atan hian Chinese club hian pound maktaduai 25 vel an seng.