Mizoramin Sub Junior Team-in Moran an thleng

29th January, 2016

Mizoram Sub Junior Team chuan National Sub Junior for 2015-16 North East Zone qualifier khel turin nimin khan Moran, Assam an thleng.

Mizoram coach C. Vanlal-hriatrenga chuan, "Kan inbeisei sang khawp mai, team dang chu la hmu lo mah ila kan player-te hi MFA Grassroots naupang leh Sports Academy Saidan a naupangte an nih hlawm avangin final round kan thleng ngei ka ring," tiin a sawi.

Mizoram hi Nagaland (Jan 31), Arunachal Pradesh (Feb 2) leh Meghalaya (Feb 4) te nen group khatah an awm a, vawi khat inkhelh kual hnua a sang berin final round an lut ang. Mizoram team hian Hriata (coach) leh C. Lal-muan-puaia (manager) te kaih-hruaina hnuaiah an khel ang.