AFC Champions League qualifiers Jeje goal hmangin Bagan-in bung thar an kai

Mohun Bagan chuan Ni--laini zan khan Salt Lake Stadium-ah Singaporean club ṭha Tampines Rovers chu 3-1 in an sawp a, Indian club zinga AFC Champions League match-a chak hmasa ber an ni.

Mariners tan a hun taka rah ṭhin Jeje Lalpekhlua'n minute nganaah a khung a, Cornell Glen-a'n minute 41-naah Bagan goal hnihna khungin mikhual team Tampines Rovers-in minute 43-naah Yasir Hanapi hmangin chhang let mah se I League champion midfielder Yusa Katsumi chuan minute 83-naah chak nemnghehna goal a khung.

Bagan chak zan hian Sony Norde-a'n goal khung lo mah se Jeje leh Katsumi goal khung tur a siam sak a, Haitian winger hi player langsar a ni. Trinidadian forward Glen-a'n club thar Bagan tan goal a khung zel a, amaherawhchu Tampines Rovers an hneh ṭum hian ama penalty hlawhchhuah chu goal-ah chantir thei lo.

Mizo tlangval Jeje chuan, "Tun season-a Bagan tana starting eleven kan chan hmasak berah goal ka khung a, record siamtu zingah ka tel bawk avangin a lawmawm dan a dangdai duh khawp mai," tiin Vanglaini palai a hrilh.

Bagan hmabak

AFC Champions League (ACL) hi Asia rama club football-a inelna sang ber a ni a, Europe khualmualpuia a tlukpui chu UEFA Champions League a ni. ACL-a record nei ṭha lo India club tan group stage thleng turin preliminary round pahnih leh playoff round patlang a ngai.

Mohun Bagan hian Feb-ruary 2 khian Chinese Super League pathumna Shandong Luneng FC chu Preliminary Round 2-ah an hmachhawn ang. India hian Jinan, China khaw vawta chak result an hlawh chhuak thei a nih chuan playoff round-ah A-League club Adelaide United FC an hmachhawn leh dawn.

I League champion Bagan squad thlirin ACL group stage thlen theih a rinawm lo a, chutihrualin tuna an thlen chin pawh hi chhuantham a tling. India ram football tana chanchin lawmawm thlentu zingah Jeje-a chu player pawimawh a ni a, Hnahthial tlangvalin Mizo tlangvalte tan chona a siam zel e.