Derby hmachhawn turin Rooney a inpeih

Zanin dar 1:25-ah Manchester United-in FA Cup fourth round an khel dawn a, Championship club Derby County khelmual Pride Park Stadium-a lenglut tur United captain Wayne Rooney chuan an inpeih tawh thu a sawi.

United captain chuan, "Derby hian hloh leh tur chuang an nei tawh lo a, chak tura beisei an nih loh avangin pressure nei miah loin mipui barakhaih an tum dawn a ni. Game harsa tak a ni dawn a, Sheffield United lakah harsa taka kan chak tawh avangin hetiang game harsa hmachhawn dan hi kan hre tawh a, kan inpeih tawh a ni," a ti.

Manchester United hian FA Cup third round-ah League One club Sheffield United chu hun pek belha Rooney penalty hmangin 1-0 in an hneh hram a ni.

Hetihlai hian Derby manager Paul Clement chuan United hmachhawn tura an phur thu sawiin, "Khawvela club lian ber pawl kan mikhual dawn avangin kan tan chuan chona phurawm tak a ni. Tun hnaiah che ṭha lo mah se world class player leh coach ropui tak an neih avangin an chhe lo," tiin Uni-ted chu a la dah sang hle.