Liverpool-in Tsimikas an lalut

Premier League champion Liverpool chuan nipui transfer-a an player lei hmasak ber ni turin Kostas Tsimikas chu Olympiakos aṭangin an lalut a, a man atan pound maktaduai 11.7 an seng.

Kum 24 mi defender hian Anfield-ah kum nga cham turin contract a ziak a, Andy Robertson thachhang dawl tur anga ngaih ni mah se player theihna nei sang bik a nih avangin Scottish defender tan tha thlah a thiang lo ang. 

Serie A club Napoli leh Ligue 1 club Nice pawhin lakluh tuma an dawr defender chuan, "Ka unaupa hi Liverpool fan a ni a, he hmuna kal tur hian min tur nasa hle a ni. Naupang ka nih lai 

aṭangin he team ṭantu hi ka ni a, ka unaupa mai ni lo, kan chhungkaw tan hun hlimawm bik a ni. "Tun thleng hian ka unaupa chuan Liverpool ka zawm tih hi a ring thiam kher lo ang. Thlalak te a hmu ang a, a awih ve chauh mahna," a ti a, Liverpool zawm chu an tan chuan mumang ram a nih thu a sawi.

 

Reds hian Norwich defender Jamal Lewis chu pound maktaduai 10-in an dawr zet a, Canaries-in pound maktaduai 20 an phut avangin Tsimikas lam hawiin an lalut zui. Hriat tel tur erawh Liverpool hian Lewis an lak theih loh avangin Tsimikas hi an ngaihven thar thut a ni lo. Kum 2018 tawp lam khan Greece defender hi an en thla tawh a, 2018-19 season chhung zawng khan uluk takin an thli thlai. 

Liverpool sporting director Michael Edwards chuan kum tir khan Reds coaching department ho a titipui a, Liverpool transfer vela pawimawh tak Edwards hian a defender lakluh duh zinga a sang pawlah a 

dah a ni. Kum 2015-a Olympiakos tana a match hmasa ber kheltu chuan, "Liverpool zawm theih hi ka tan chuan chawimawina ropui tak a ni a, ka tan chuan he club hi khawvela club lian ber a ni," a ti. 

Season hman zawh taka Olympiakos tana league match 27 kheltu hian a career-a nomawi lian tham hmasa ber chu 2019-20 season-ah a chawi a, Super League Greece-ah a champion. Tsimikas hian an ram Greece tan match thum a khel tawh bawk.

Liverpool manager Jurgen Klopp chuan, "Kostas hi rei tak chhung kan lo en thla tawh a, min zawm thei hi kan lawm takzet. Anfield-a kan kir leh hmaa chanchin hriat lawmawm tak a ni. Footballer ṭha tak, inel nuam ti mi a ni a, a rilru puthmang hi ka duh zawng a ni - kan dressing room nen a inmil hle. 

"Kostas hian a mimal tawnhriat aṭang pawhin league leh Champions League beisei tura inelna hi a hrethiam a, keimahni ang thoin hlawhtlin zel duhin a tuihal reng a ni," tiin a defender thar chu a fak.