Lukaku telna Inter an chak

Dusseldorf-ah Inter Milan-in Bayer Leverkusen 2-1 in an hneh a, Antonio Conte hoten Europa League semifinal an thleng. Thawhṭanni zan inkhelah hian Italian club tan Nicolo Barella leh Romelu Lukaku ten an khung. 

Inter hian semifinal-ah nizana Shakhtar Donetsk leh Basel inkhela chak zawk zawk an hmachhawn ang. Italian club tana chakna goal khungtu Romelu Lukaku-a'n Europa League-ah match kua a zawnin goal a khung a, record a siam.

Goal khung thei Lukaku Manchester United-in a ṭhatna tak hre lo mah se Antonio Conte-a'n Chelsea a enkawl lai aṭanga a awh tawh Romelu Lukaku hman dan a thiam. Kum 27 mi Lukaku hian Serie A-ah goal 23 khungin Inter hi pahnihna a nihpui tawh a, Europa League-ah pawh a che ṭha hle. Bayer Leverkusen nen hian Lukaku-a'n bul a ṭan ṭha, minute 15-na leka a ball pet defender dan per chu box pawn aṭangin Nicolo Barella-a'n mawi zetin a khung.

Italian midfielder kum 23 mi Barella thiamzia pholanin a awm a, Tottenham rinrawl ni ṭhin Christian Eriksen te meuh pawh bench-a an awm phahna chhan a nih avangin a thiam tih a chiang. Italian manager Conte-a'n player a thlanin duh chhan a nei tih a lang a, Manchester United duh loh Ashley Young pawh a la hmang ṭangkai hle.

Minute 21-naah Ashley Young-a ball pass chu Lukaku-a'n tlu chungin goal-ah a chantir a, Bayer Leverkusen-in Kai Havertz hmanga an siphurh an sut ṭhen leh bawk avangin Belgian striker goal khung hi a pawimawh hle.

United hnawl hnu Alexis Sanchez pawh second half-ah a rawn inlan a, Chilean forward hian chak nemngheh theihna hun ṭha a neih chu goal-ah a chantir thei lo. Inter Milan hian United player hlui pathum an kawl a, English club hmachhawn tur erawhin final an thlen ve ve a ngai thung.

Bayer Leverkusen-in Inter Milan an hneh loh avangin an season a tawp a, goal khungtu Kai Havertz-a'n chelh thei ang em tih chu zawhna a ni ta. Havertz hian tun season inelna hrang hrangah midifielder a ni nachungin goal 18 a khung a, a inzirchhuahna Leverkusen chhuahsana chona thar hmachhawn a duh.

Kum 21 mi Havertz hi Chelsea nena sawi zawm a ni a, amaherawhchu German club hian a manah pound maktaduai 90 bawr vel an chhiar avangin London club-in a man hi dawn thlak an la tum. Blues hian pound maktaduai 75-in Leverkusen an dawr dawn tih thawm a awm a, an hlawhtling a nih chuan Chelsea ṭantute tan thu lawmawm a tling ang.

Frank Lampard-a'n season thar atan Hakim Ziyech leh Timo Werner te an lalut tawh a, Havertz an besei leh mek. Chutihrualin Chelsea hi ngaih ṭha taka awm thei an ni lo - Real Madrid, Barcelona, Bayern Munich leh Manchester United te hming a ri tel a, Leverkusen sum beisei zat an theh chhuak phal a nih loh chuan Havertz lak a awlsam lo ang.