League Cup final-ah Liverpool kan hmu dawn

Liverpool manager Jurgen Klopp-a'n a season khatnaah Wembley a pan nghal dawn - Liverpool chuan Thawhlehni zan khan League Cup semi-final-ah Stoke City chu penalty hmangin an hneh a, Wembley stadium-a League Cup final khel turin an in pet kai.

Britannia Stadium-a semi-final first leg-ah Liverpool-in 1-0 in hnehna an lo chang tawh a, Anfield-ah second leg khelh a ni. Mikhual team Stoke tana Marko Arnautovic goal khung Liverpool-in an sut theih loh avangin inkhel hmasa nena belhkhawmin team pahnih an inhnehtawk.

Extra time khelh chhun-zawm niin goal a luh loh hnuah penalty hmangin chak zawk zawn a ni a, Reds player zingah Emre Can chiahin a pet goal loh laiin Stoke tan Peter Crouch leh Marc Muniesa-te'n an pet goal thei lo a, Liverpool-in 6-5 a hnehna changin final an lut.

Sawisel hlawh goal

Stoke-in minute 45-naah Marko Arnautovic hmangin goal an khung a, Austrian forward goal khung hi offside niin lang mah se linesman-in a phar miau loh avangin goal-ah pawm a ni.

Liverpool manager Klopp chuan, "Stoke City goal khung kha chiang takin offside a ni. Mahse, penalty-ah a van-nei zawk kan ni ta tho a, a lawm-awm tho e," tiin penalty chu offside a nih thu a sawi.

Second half ṭan tir lamah Liverpool-in Roberto Firmino hmangin an si phurh sutna hun ṭha nei mah se Brazilian forward hian post a pet per.

Stoke City-in extra time-ah goal hnih khungna hun ṭha nei mah se goal-ah an chnatir thei bik lo a, Marco van Ginkel chuan hnai set sawt aṭangin post a pet per. Mikhual team tan Jonathan Walters leh Peter Crouch-te an khel ṭha a, Liverpool tan Mamadou Sakho a khel ṭha takzet bawk.

Klopp-a tan lawmna

Borussia Dortmund mana-ger hlui Jurgen Klopp-a'n Liverpool a enkawl hnuah result a inpawlh a, German manager hnuaiah Reds-in game mawi tak khel ṭhin mah se team tenau lakah chak loh leh khut an ching.

Mahse, Jurgen Klopp-a'n League Cup final-ah Liverpool a hruai thleng ta a, a season hmasa ber a ni bawk nen Ger-man manager tan chuan bul
ṭanna duhthusam a ni.

Klopp hian League Cup nomawi a chawi thei a nih chuan an season hmasa bera League Cup-a champion Chelsea manager hlui Jose Mourinho leh Manchester City manager Manuel Pellegrini-te hnung a zui dawn tihna a ni.

League Cup hi Premier League-te angin nomawi lian thama chhiar chi a ni lo mai thei. Mahse, tun hnaia Premier League club-te ṭhat tawh zia leh nomawi chawi har tawhzia ngaihtuahin Reds tan League Cup final luh hi lawm lohna chi a ni lo a, ngaihhlut loh theih a ni lo.

Kum 2012-a Kenny Dalglish hnuaia League Cup nomawi an chawi hnua nomawi lian tham la chawi leh lo Liverpool tan League Cup final luh hi a lawmawm lehzual ang.

Fak phu Mignolet

Tun hnaiah Liverpool keeper Simon Mignolet-a'n holam taka goal chhuah a ching a, tun hnaiah Anfield-ah season nga cham tura contract thar a ziak phei chuan mak tih a hlawh hle.

Mahse, Belgian keeper hian Stoke City an hnehna inkhelah a khel ṭha takzet a, Liverpool final luhna turin Crouch leh Muniesa-te penalty pet a dang bawk - a penalty dante hi keeper naran tana dan theih a ni lo.

Beiseina thamral

Anfield-ah Stoke City fan-te'n banner lian tak 'The Spirit of 72' tih an keng a, kum 1972-a League Cup nomawi an chawi ṭum kha hre rengin chhawm nun an duh. Stoke City hian kum 1972 League Cup final-ah Chelsea chu hnehin an club chanchina nomawi lian tham an chawi hmasak ber an chawi a, tun thlengin nomawi dang an la chawi leh lo.

Arnautovic-a goal khung hnuah Stoke player-te khel
ṭha viau mah se an beisei ang goal erawh an hmu thei lo a, an fan-te beiseina an ti hlawhtling thei lo. Stoke tana lawmna tur erawh kum 1959 hnua Anfield-a hun pangngaia an chak hmasak ber a ni.

Eng nge an sawi?

Liverpool manager Jurgen Klopp chuan, "A ropuiin a boruak pawh a nuam hle. Team hmachhawn harsa tak lakah game ṭha tak kan khel a ni. Stoke City hian an khelh dan an rawn thlak hlawk a, an keeper Jack Butland aṭanga Peter Crouch thleng khan an khel ṭha em em vek a ni. Tlarhnung lam tan hna a tam a, goal khungna hun ṭha erawh an nei tam bik lo," tiin an khingpuite chu an khelh ṭhat thu a sawi.

Klopp chuan sawi chhun-zawmin, "Minute 120 kha kan thlir kir erawh chuan chak kan phu a, ka player leh mipuite pawhin chak an phu a ni. Wembley hi football khelh nana hmun nuam tak a ni a, chak lo zawk nih erawh thil nuam a ni lo," tiin an final khelh tur a thlir lawk.

German manager hian Dort-mund a enkawl laiin Wembley-ah Chamnpions League final 2013 khan a lo khel tawh a, Bayern Munich lakah 2-1 in a tlawm zawkah an ṭang a ni.

Stoke manager Mark Hughes chuan, "Kan inkhel pumpui thlirin team ṭha zawk kan ni a, ka player-te khelh dan kha ka chhuang takzet a ni. Team ṭha kan nihzia hi chu kan lo pholang fo tawh a, Liverpool kha penalty pet a nih dawn avang khan an lawm hle a ni. Kan khelh dan aṭang ringawt chuan chak phu zawk kan ni," tiin chak phu zawkah a inngai.

Inkhel chhehvel

Liverpool-in League Cup semifinal vawi riat an hma-chhawn tawhah vawi khat chiah final an lut zo lo a, Anfield-a League Cup semifinal an khelhin an la tlawm ngai lo.

Stoke hian League Cup-ah Liverpool hi vawi sarih an hmachhawn tawh a, vawi ruk a tlawm zawkah ṭangin vawi khat an inhnehtawk.