Barca kan hneh thei - Bellerin

Arsenal defender Hector Bellerin chuan Champions League last 16-a an hmachhawn tur Spanish club lian Barcelona chu an hneh theih a rin thu a sawi.

Gunners hi tun season Champions League group match hmasa pa-hnihah an tlawm ve ve avangin knockout round lut tura beisei an ni lo. Mahse, October thla khan Emirates Stadium-ah German champion Bayern Munich chu 2-0 a hnehin beiseina an insiam thar a, rin loh takin last 16 an inhlangkai. Spanish defender hian Bayern an hneh theih nan Mesut Ozil goal khung tur a siam sak nghe nghe.

Barca youth academy chhuak Bellerin chuan, "Barcelona-ah hian kum riat chhung ball ka lo pet tawh a, anni hmachhawn zawnga khelh chu ka tan thil nuam tak a ni hran lo ang. Kan inkhel dawn tih kan hriat tirh khan message leh call ka dawng hnem hle. Tunah hian kan team boruak a ṭha em em a, kan khelh ṭhat ni chuan khawvela team ṭha ber pawh kan hneh thei ang. Bayern kan hmachhawn hmasak zawng ṭum anga kan khel a nih chuan Barca pawh hi kan hneh theih ngei ka ring," a ti.

Arsenal hian February 23-ah Barcelona hi Cham-pions League last 16 first leg khel turin Emi-rates Stadium-ah an mi-khual dawn a, March 9-ah second leg khel turin Nou Camp-ah an zin leh ang.