I League Under 18 Aizawl FC leh Wahingdoh inhnehtawk

28th January, 2016

Nimin khan I League Under 18 final round khelh ṭan a ni ta a, Group B match hmasa berah Aizawl FC leh Royal Wahingdoh te 1-1 in an inhnehtawk.

Kolkata-a inkhelah hian Royal Wahingdoh-in Suraj Rawat hmangin second half ṭan aṭanga minute hnihna lekah hma an hruai a, Aizawl FC-in Lalrinchhana hmangin minute 59-naah an sut a, goal dang a luh belh lo.

Group A inkhel dang-ah Salgaocar-in East Bengal 2-1 in an hneh. Aizawl FC hian inelna thlengtu Kolkata club East Bengal hi January 29 tlai dar 2:15-ah an hmachhawn ang.

Group B inkhelah TATA Football Acade-my-in Lonestar Kashmir 4-0 in an sawp a, inkhel hnuhnung zawkah AIFF Elite Academy-in SAI Guwahati chu 3-0 in an hneh leh bawk. AIFF goal hmasa ber hi Mizo rawlthar Edmund Lalrindika'n minute 42-naa a khung a ni.

Inelna Kalphung

I League Under 18 final round khel turin team 10 an tling a, Group A-ah DSK Shivajians, TATA FA, SAI-Guwahati, AIFF Elite Academy leh Lonestar Kashmir te awmin Group B-ah Aizawl FC, East Bengal, Pune, Royal Wahingdoh leh Salgaocar te an awm thung.

Group A match-te hi Howrah Municipal Corporation Stadium, Kolkata-ah khelh a ni a, Group B match-te hi East Bengal Ground, Kolkata-ah inelna hi neih a ni. I League Under 18-ah hian goal difference aiin head to head dah pawimawh a ni a, a sang pahnihin semifinal an khel ang.

Mizo che ṭha

I League pangngai ang thoin kum 18 hnuai lam inelnaah hian Mizo player an ṭhahnem a, an langsar tel bawk.

Qualifier-ah Pune FC U18 striker Lalawmpuia chuan goal 14 khungin top scorer a ni a, DSK Shivajians striker India senior tan pawh a inlan tawh Lallianzuala Chhangte chuan goal 9 khung-in pahnihna a ni.

Aizawl FC striker Rochharzela'n goal sarih khungin amah aia khung tam panga chiah an awm a, Pune midfielder Amos Lalnienga leh AIFF Elite Aca-demy midfielder Ed-mund Lalrindika te'n goal nga ve ve an khung bawk.

Ṭhiantea goal khung tur siam kawngah pawh Mizo bawk an langsar a, MPL U17 inelna hmasa pahnih a best player Jerry Mawihmingthanga chu DSK Shivajians captain niin assist vawi ruk a nei tawh a, assist ngah ber a ni. Reitlang FC midfielder hlui Jesse Laldinpuia Ralte (DSK Shivajians) chuan vawi li assist a nei a, Aizawl FC U18 duo Lal-awmpuia Hnamte leh Ro-chharzela te'n assist vawi thum ve ve an nei bawk.