Aus Open hmeichhe semifinal khel tur hriat kim ta

Nimin khan Australian Open hmeichhe single quarterfinal khelh zawh a ni a, Johanna Konta leh Angelique Kerber te chuan semifinal an inhlangkai ve leh ta.

Vawiin hian semifinal hi khelh chhunzawm nghal tur niin Thawhlehni lama quarterfinal lo paltlang tawh seeded pakhatna Serena Williams leh seeded palina Agnieszka Radwanska te zing dar 8:00-ah an inkhel ang a; Konta leh Kerber te pawh chawhma dar 10:00-ah an in hmachhawn zui ve bawk ang.

Quarterfinal hnuhnung chu

Kumina Grand Slam inelna hmasa berah hian seeded 32 chauh siam a ni a, kum 24-a upa Konta hi world number 47 daih a nih avangin tun tournament-ah hian seeded chang pha lo pawl a ni a, mahse beisei phak baka rawn khel ṭhain China nula Zhang Shuai chu darkar khat leh minute 19 chhungin 6-4, 6-1 a hnehin semifinal a inhlangkai thei.

Quarterfinal kalkawnga Venus Williams leh Ekaterina Ma-ka-rova lo hneh tawhtu Konta chuan, "Ka khingpui kha mi tum ruh tak a nih avangin hmachhawn a harsa hle. Point khat chauh pawh hlawhchhuak turin tha sen hnem a ngai ṭhin hle a, harsa taka hnehna ka chan theih avangin ka lawm hle," a ti. Last four inhlangkai thei chinah Konta chiah hi seeded chang phak lo a ni nghe nghe.

Inkhel dangah seeded pa-sarihna Kerber-i'n a beisei ngam loh result a hlawhchhuak a, an intawn hnuhnung vawi ruka a a hneh loh vek seeded 14-na Victoria Azarenka chu 6-3, 7-5 in a hneh.

World number 1 hlui Aza-renka hian kum 2012 leh 2013 khan Austrlian Open title hi a lo la tawh a, kuminah pawh hian player beisei awm ber pawl ni mah se a tawp a thleng zo ta lo a ni.

German tennis star Kerber chuan, "Court chhunga ka rawn luh hma kha chuan ani laka ka record kha 6-0 a ni a, inrintawkna neih san a harsa hle. Mahse, ka inseh ruh a, keimah leh keimah infuih phurin practice-na a ka khelh anga khel chhuak ngei turin ka ruilru ka ti paukhauh tlat a, ka hlawhtlinpui ta a ni," tiin a sawi.

Last four thlir ang

Semifinal hmasa zawk khel tur world number 1 Serena hian a khingpui tur Radwanska lakah re-cord a nei ṭha hle a, an intawn hnuhung vawi riatah hnehna a chang fai vek. Kum 2012 Wimbledon final khan a lo hneh tawh bawk a ni.

Inkhel hnuhnung zawk tur Kerber leh Konta te hi tun hmain an la inhmachhawn ngai lo a, tun ṭum hi an intawn vawi khatna tur a ni. Player pahnih Konta leh Kerber te hian tun hnaiah an ram Britain leh German an ti hmingṭha hle.

British hmeichhia te hian Grand Slam inelnaaah hnuhma an nei ropui lo hle a, kum 1983-a Jo Durie-i'n US Open semifinal a luh hnuah Konta hi British hmeichhia a major tournament-a last four inhlangkai thei leh hmasa ber a ni.

Hetiang deuh tho hian German zingah kum 1998-a Anke Huber-i'n Australian Open semifinal a luh hnua hetiang dinhmun thleng leh thei hmasa ber chu Kerber hi a ni.