East Bengal chakna Ranti Martins

DSK Shivajians-in an-mahni ang bawka I League kaithar Aizawl FC an hneh loh aṭanga ni linaah game nung zawk khel mah se captain Douhou Pierre Dica clear ṭhat tawk loh an tuar a, East Bengal striker Ranti Martins-a'n goal awmchhun a khung.

Thawhlehni zan Ba-rasat Stadium-a inkhelah Biswajit Bhattacharya-a'n Kolkata Derby-a a player chhawrte bawk a hmang nawn a, DSK Shi-vajians boss Derrick Pereira erawhin player panga ngawt a thlak a, Ramhlun South defender Zohmingliana Ralte chu inhliam vangin a inlan thei lo a, North Mualcheng tlangval Sena Ralte-in a vawi khatna atan starting eleven a chang thung.

Ṭan aṭanga minute 10 chhung lekin Red and Gold Brigade-in South Korean striker Du Dong Hyun leh Nigerian forward Ranti te'n chance ṭha an hlah a, DSK lam tan midfielder Douhou Pierre freekick pet chu Rehenesh-a'n a dang ṭha viau bawk.

Minute 30-naah DSK-in team thar an nihna an lantir nawn leh a, defence buai kara Dica ball petchhuahin hmun a him a thleng zo lo a, box pawn chiah aṭanga Mohammad Rafique-a crossbar pet per let leh chu awlsam takin Ranti-a'n goal-ah a chantir a, goal dang a luh belh tawh lo.

East Bengal-in 1-0 in hnehna an chang a, match li khelh tawh aṭangin hneh loh la tawng lo mah se vawi hnih an draw tawh avangin vawi thum khelha la chak vek Bengaluru aiin point khatin an hmu tlem zawk.