Simeone-a'n Torres chungchang sawichiang duh lo

Atletico Madrid manager Diego Simeone chuan season tawp ruala a contract tawp mai tur Fernando Torres nena an inbiak dan a sawi chhuak duh lo.

Kum 31-a upa striker hian amah chher chhuaktu Atletico hi AC Milan aṭangin kum 2014 khan loan-in a zawm a, a loan hun tawp ruala a ngheta la lut turin club captain Gabi chuan Atletico thuneitute a lo ngen tawh a ni.

Simeone chuan, "Fernando nen hian kan inkawm tawh a, ka ngaihdan ka hrilh bakah a ni pawhin a ngaihdan ṭha takin min hrilh a, kan inbiakna hi chu kan pahnih inkara hriat atan a tawk rih a ni," tiin Torres nena an inbiak dan chu a zep rih.

Atletico Madrid hi tun hnaiah kum tling lo player an lakluh danah dik lo awma ngaiin FIFA chuan 2016 nipui transfer leh 2017 January transfer-ah player la lut thei lo turin a hrem a, an hremna hi khinglet mah se kaltlangpui tho a nih a rinawm.