Inkhelh tlem chhan chu khelh chhiat vang - Falcao

Chelsea striker Radamel Falcao chuan khelmual chhunga a inlan tam loh chhanah a hliam tawrh ṭhin a mawhpuh duh lo a, a khelh ṭhat tawk loh vang niin a sawi thung.

Colombia international hian season hmasa khan Man United tan a khel a, goal li a khung. Tun season-ah Stamford Bridge-ah loan bawkin a kal leh a, match 11 inlan tawhin goal khat chiah a la khung a ni.

Chelsea striker Falcao chuan, "Ka khup na a dam tawh a, tuna ka mamawh chu season lo la awm leh tur zawng hi ṭha taka khel thei tura inrintawkna ka neih a ngai a ni. Hliam hi inkhelh tlem chhan chhuanlama hman a fuh lo a, kan ṭha tawk a nih chuan manager-in inkhel turin min thlang mai ṭhin," a ti.

A chungchang an sawina chhang letin Falcao chuan, "Thu-thar thehdarhtu ṭhenkhat hian ka chanchin duhawm lo lai leh ka khelh chhiat thu mawlh an sawi
ṭhin a, thudik tawk lo an sawi fo. Min duhsaka thu ṭha min hrilhtu an awm ve reng bawk a, heng mite hian chakna leh phurna min siamsak zawk," tiin a sawi.