China lamah Gervinho a kal

28th January, 2016

AS Roma winger Gervinho chuan Chinese Super League club Hebei China Fortune FC a zawm. Ivory Coast international manah hian Chinese club hian pound maktaduai 15-18 bawr vel an theh-chhuaka ngaih a ni.

Kum 28-a upa winger hian kum 2013 khan Arsenal aṭangin Roma hi a zawm a, Serie A club tan hian vawi 71 inlan hmanin goal 17 a khung a ni.

Ivory Coast footballer of the year ṭum hnih lai ni tawh Gervinho hian tun season-ah Roma tan match 17 inlan tawhin goal sarih a khung a, a
ṭhiante thun tur vawi hnih a siamsak bawk.

Hebei China Fortune hian season hmasa kha China League One-ah khel-in tun season hi China rama club football inelna sang ber Chinese Super League-a an inlan vawi khatna a ni a, season ṭan dawn khan Schalke leh Besiktas striker hlui Edu an lo la lut tawh bawk.