A thiam pali zingah Murray leh Raonic
Novak Djokovic leh Roger Federer ten Australian Open semifinal an in vuak tlin hnuah nimin khan Andy Murray leh Milos Raonic te pawhin an hnung an rawn zui ve leh a, vawiin chawhnu lam hian semifinal hmasa zawk khelh chhunzawm tur a ni.
Grand Slam vawi 17 champion tawh Federer leh Grand Slam vawi 10 champion tawh Djokovic te hi vawiin chawhnu dar 2:00 hian an inhmachhawn dawn a, khawvel mipui hmuh chak a ni. Zirtawpni khian Murray leh Raonic ten semifinal hnuhnung zawk an khel ve leh ang.
A vawi ruk nan Murray
Seeded pathumna Murray chuan tun hnai kum sarih chhunga a vawi ruk nan quarterfinal a paltlang. Rod Laver Arena-ah seeded pariatna David Ferrer chu darkar thum leh minute 49 chhungin 6-3, 6-7, 6-2, 6-3 in a hneh.
Britain number 1 Murray chuan, "Bul ka ṭan ṭha tawk lo a, unforced error ka nei ngun hle. Set hnihna aṭang kha chuan ka inkhel a pangngai ṭha chho viau a, ka khingpui Ferrer kha a khelh ṭhat ve bawk avangin inkhel hautak tak a ni," a ti.
Kum 28-a upa Murray hian Grand Slam tournament-ah vawi 18 final a luhna chiah a ni a, Wimbledon (2013) leh US Open (2012)-ah te a champion tawh. Semifinal-a a khingpui tur Raonic nen hian vawi ruk inhmachhawn tawhin vawi thum ve ve hnehna an chang tawh a ni.
Canada tan Raonic
Mipa quarterfinal inkhel hnuhnung berah world number 14 Raonic chuan darkar hnih leh minute 17 chhungin Gael Monfils chu 6-3, 3-6, 6-3, 6-4 in a hneh a, Canadian tennis player zingah Australian Open semi-final thleng thei hmasa ber a ni.
Tun hnaiah Raonic hi a khel ṭha tluang hle a, a zawnin match kaw chhung hnehna a chang tawh. January thla tir khan Brisbane final-ah Federer hnehin a champion.
Kum 25-a upa Raonic chuan, "Ka beidawn duh loh rah ka seng a ni ber. Harsa lutuk loin set khatna la mah ila set hnihnaah ka talbuai a, mah se ka insiam ṭha zui nghal. Tennis court chhungah hian inkhel hautak tak tak ka lo hmachhawn tawh a, chung zingah chuan vawiin kan inkhelh pawh hi a tel," tiin a sawi.
Federer vs Djokovic
Tunlai khawvela mipa tennis player langsar ber pahnih Federer leh Djokovic te hi tun hmain vawi 44 an lo inhmachhawn tawh a, vawi 22 ve ve hnena chang tawhin an intluk. Vawiinah hian pakhat zawk chu a chungnung zawkah a ṭang dawn a ni.
Kum 34-a upa Federer hian Djokovic hi kum 2012 Wimbledon-a a hneh hnuah tun hnaiah a ngam vak lo a, Grand Slam tournament-a an intawn hnuhnung pathumah a chak lo vek.
Australian Open bikah hian Serbian thiampuipa Djokovic hi vawi nga a champion tawh a, kuminah hian a champion thei a nih chuan he inelnaa champion tam ber vawi ruk champion tawh Roy Stanley Emerson record a tluk dawn chiah a ni.
World number 1 Djokovic chuan, "Nikum khan Federer nen hian Grand Slam final pahnihah kan inhmachhawn a, tun hma pawhin kan lo inhmachhawn fo tawh avangin a ṭhat zia ka hre chiang. Ani nen chuan eng round-ah pawh kan intawng a nih chuan final tluka hautak a ni zel, inkhel hautak tak a nih ka ring," a ti.
World number Federer chuan, "Ka tan chuan chona thar a ni zel a, tun dinhmuna khawvela ṭha ber hmachhawn turin ka inpeih. Tun chauh lo pawh hi kan la inhmachhawn leh ka ring," tiin a khingpui tur a fak.