FA-in Chelsea leh West Brom a hrem

English football-a thuneitu sang Football Association chuan January 13-a an inhma-chhawn
ṭuma mawi lo taka che Chelsea leh West Brom-te chu an player-te khawsak dan mawi lo avangin pawisa chawi turin a hrem.

FA chuan mualneitu Blues chu £65,000 (Rs. 63,42,527.04) chawi turin an hrem a, West Brom chu £35,000 (Rs. 34,15,206.87) chawi turin an ti bawk. FA chuan club pahnih hi khelmual chhunga an player-te awm dan an thunun theih loh avanga hrem an nih thu an puang.

Premier League-a an inhmachhawn ṭum hian team pahnih hian goal hnih ve ve khungin an inhnehtawk a, yellow card pathum ve ve an chawi bawk. A bik takin Chelsea striker Diego Costa leh West Brom midfielder Claudio Yacob-te chu he inkhela an intihbuai avang hian an langsar hle.

Baggies manager Pulis chuan Costa ti tlutu Yacob hi Costa nen an intihbuai aṭanga rei lo teah a la chhuak nghal a, Chelsea manager lailawk Guus Hiddink chuan Yacob hnawh chhuah a ni lo hi mak a tih thu sawiin Premier League match-a referee-in hna a thawh chhiat ber ṭum nia a hriat thu a lo sawi tawh nghe nghe.