Liverpool rim lai Teixeira man a to

Shakhtar Donetsk coach Mircea Lucescu chuan tun hnaia Liverpool-in lakluh tuma an dawr Alex Teixeira chu euro makrtaduai 50 (pound maktaduai 38) man a nih thu a sawi.

Reds hian Teixeira lakluh tum hian pound maktaduai 24.5-in Shakhtar Donetsk hi an lo dawr tawh a, mahse Ukrainian club hian Liverpool hi pawisa tam zawk an phut avangin an lo hnar tawh.

Brazilian club Vasco da Gama-a a career ṭantu Teixeira hi tun season-ah Ukrainian club tan a che ropui hle a, league match 15 a khelh tawh aṭanga goal 22 khungin Champions League match sawm a khelh aṭangin goal li a khung bawk.

Shakhtar coach Lucescu chuan, "Teixeira hi euro maktaduai 50 man vel a ni. Player thiam bik, che rang leh ball thiam tak a ni. A kum rualpui player ṭhenkhat an khelhna club-a danglamna thlentu te nen ka khaikhin hial a ni. Angel Di Maria-a'n Paris Saint-Germain tana danglamna a thlen thei ang hian a thlen thei a, anni ai pawn a
ṭha thei hial zawk ang. A inhliam ngai bawk si lo a, kum tin hian a
ṭha tawlh tawlh a ni," a ti.

Lucescu chuan Teixeira an hralh dawn leh dawn loh erawh club president kuta a innghah thu a sawi a, "Teixeira chhuah leh chhuah loh chu kan president kutah a innghat a, a thutlukna a ni. Kei chuan player tui tawh lo chung chelh ka duh lo a, Teixeira hian inelna liantham taka khelh a duh a ni," tiin a player chu chelh a tum loh thu a sawi.