Serena hneh loin Sharapova a tla

Tunlai khawvel hmeichhe tennis roreltu Serena Williams chuan Australian Open semi-final lut turin harsatna a la tawk lo. Nimin khan Maria Sharapova chu straight set a hnehin quarter final a paltlang.

Rod Laver Arena, Mel-bourne Park-a inkhelah seeded pakhatna Serena hian seeded pangana Sharapova lakah hian 6-4, 6-1 in hnehna a chang a, set hmasa zawk la turin minute 55 a hman laiin set hnuhnung erawh minute 37 chhungin awlsam takin a la zui a ni.

Australian Open vawi ruk champion tawh Serena hian Russian star Sharapova lakah hian kum 12 chhung zet a zawnin hnehna a chang tawh a, tun hnai an intawn hnuhnung 18-ah a chak fai vek a ni.

Kum 34-a upa Serena hian a vawi 22 nana Grand Slam title la turin beiseina a nei sang hle a, semifinal-ah chuan seeded palina Agnieszka Radwanska nen an inhmachhawn leh dawn a ni.

American chuai thei lo Serena chuan, "Player ṭha tak nena kan inhmachhawn a nih chuan thil hi a awlsam lo ṭhin hle a, fimkhur taka chet pawh a ṭul ṭhin. Tunkar chhungin ka inkhel hnemin ka chau ve tawh a, khatiang em ema ṭha khan ka khelh chhuah theih pawh ka beisei lo hial. Set hnihnaa ka khelh dan kha chu duhthusama ṭha a ni e," tiin a sawi.

Russian star Sharapova chuan, "Midang nena kan inkhelh ṭuma ka service anga na a ka vuak pawn Serena hi chuan na takin min rawn nawr let nghal thei zel a, ani hmachhawn hi chu a harsa tak zet zet a ni. A lak aṭang hi chuan point khat chauh pawh hmuh hi a harsa hle," a ti.

Kumina Grand Slam tour-nament hmasa ber Australian Open-ah hian Sharapova hian Serena a hmachhawn hma khan match li khelin vawi 52 ngawt ace a siam thei a, mahse quarterfinal-ah erawh vawi thum chiah siam theiin a service vawi li ngawt chhuhsak a ni bawk.

Nimin vek khan quarterfinal inkhel dangah world number 4 Agnieszka Radwanska chuan Carla Suarez Navarro lakah darkar khat leh minute 22 chhungin 6-1, 6-3 in hnehna a chang a, a vawi hnihna tan Australian Open semifinal a inhlangkai ve bawk.

Inkhel ṭan tirh aṭangin Radwanska hian a khel ṭha hle a, Navarro service hmasa a chhuhsak bakah game hnuhung paruk aṭangin pangaah hnehna a chang a, awlsam takin set a la. Set hnihnaah pawh 3-3 a nih hnuah Radwanska hian game hnuhnung pathum a la fai leh vek a ni.

Polish tennis palyer Rad-wans-ka chuan, "Inkhelh hma aṭang khan a hautak dawn tih ka hre lawk a, ka rin ang ngeiin kan tlan nasa hle. Point khat hlawhchhuak tur pawn kan beih ngial a ngai ṭhin a ni. Chawlh hahdam lawk ka mamawh a, chumi hnuah nuamti taka semifinal ka khelh chhunzawm theih ka beisei," tiin a sawi.