Real Madrid duhthlan palina Benitez

Spanish club lian Real Madrid president hlui Ramon Calderon chuan Real manager an ban tak Rafael Benitez chu a tira club enkawl tura thlan a nih loh thu sawiin Spanish club chuan an duh-zawng coach an hmuh theih loh avang chauha Benitez chu ruai an nih thu a sawi.

Calderon chuan, "Benitez khan dinhmun derthawng sa ni chungin Real kha a zawm a ni. Real duhthlan hmasa ber a nih loh miau avangin a chetsual hlekah an ban nghal dawn tih a chiang a, a dinhmun kha a him lo em em a ni," a ti.

Real president hlui chuan sawi chhun-zawmin, "Real khan Jose Mourinho lakluh an tum hmasa ber a, mah se Portuguese manager hian chhuanlam siamin a kir duh lo. Joachim Low an dawr hlawhchham leh a, chumi hnua Jurgen Klopp an dawr hlawhchham leh hnuah Benitez hi chu an la lut ve chauh a ni," tiin Liverpool boss hlui chu Real duhthlan palina a nih thu a sawi.

Calderon chuan Real enkawl tura Zinedine Zidane thlan a ni chu risk lian tak a nih thu sawiin, "Coaching lama tawnhriat nei tlem tak a ni a, Real tan risk lian tak a ni. Thlirna tlang dang aṭanga thlir erawh chuan Real player ropui a ni a, player-te pawhin an zah ang. Chuvangin Real-ah hian hlawhtling turin theihna a nei tho a ni," tiin Real manager thar chung-chang a sawi lang bawk.