Aizawl DFA hnuaia inelna semifinal

27th January, 2016

Vawiin hian Lammualah Aizawl DFA hnuaia second division club ten semifinal an khel dawn a, third division club ten Republic Veng khelmualah final lut tur an zawng thung ang.

Football Kalphung

Tualchhung football-a inelna sang ber chu MFA hnuaia khelh ṭhin Mizoram Premier League a ni. MFA hnuaiah district FA pariat awmin an awmna mil zelin tualchhung football an kalpui a, district tin hian MPL Qualifier khel turin team pahnih ṭheuh an thawh thei a, chutihrualin MPL cri-teria zawm thei club an neih loh chuan an thawh kher a ṭul lo thung.

Aizawl DFA hnuai first division inelna chu khelh zawh a ni tawh a, champion Chhinga Veng leh pathumna Ramhlun North ten MPL5 Qualifier an khel ang. Hetihlai hian MPL aṭanga relegate Mizoram Police chu Aizawl DFA hnuaia first division-ah an tla thla dawn a, first divsion league-a pasarihna Electric Veng FC leh pariatna Upper Republic FC te erawh season tharah second division a ni tawh ang.

MPL Qualifier hi khelh thuai a ni dawn a, he inelnaa point sang ber hi MPL5 khel turin an tling ang a, pahnihna erawhin MPL4 pasarihna Luangmual nen double legged playoff an khel thung ang.

II & III Div

Aizawl DFA hian an hnuaia second division leh third division club tan season khatah hian vawi hnih emaw vawi thum emaw knockout tournament an buatsaih ṭhin. Inelna vawi khata champion hian point 15 an hmu a, pahnihnain point 7 hmuin semifinalist-in point thum an hmu a, third division bikah quarterfinal lut chinin point khat an hmu bawk.

Tun ṭum inelna hi tun season-a inelna vawi hnihna chiah a ni. Second division-ah club pariat an awm a, point 15 hmu tawh champion lai BS FC an tla tawh mah se first division lut thei an la ni. Anni bakah hian kai thar Venghlui FC (7 Pts), 1st Bn MAP (3 Pts), FC Bethlehem (0 Pt) leh Mission VT (0 Pt) te hi first division-a la la lut chho thei an ni.

Second division aṭang hian team pahnihin division sang zawkah an kai chho ang a, third division-ah team pahnih an tla thla ang. Third Division aṭang hian team pahnih second division-ah an lut chho bawk dawn.