Mozambique coach thar Abel Xavier

Liverpool defender hlui Abel Xavier chu Africa ram pakhat Mozambique coach atan ruat a ni. Mozambique hi FIFA ranking-ah 109-na niin an ram chanchinah World Cup an la khel lo.

Mozambique-a piang Portuguese khua leh tui nihna neih vanga Portugal tana vawi 20 inlan tawh defender chuan, "Kum engemaw zat chhung chu Mozambique national football team hi ka lo thlir reng tawh a, ka pianna ram ngeia ka lo kir leh thei ta hi ka lawm hle a ni," a ti.

PSV Eindhoven tan pawha lo khel tawh defender hian player a nih chhungin chanchin a ngah hle a, Everton aṭangin an hmelma club Liverpool a zawm a, Reds manager Gerard Houllier nen an inhmuhthiam loh zui avangin Galatasaray lamah Reds hian a season hnihnaah an chhuahtir nghal a ni. Middlesbrough tana a khelh laiin damdawi hman phal loh hman avangin thla 18 chhung hrem a lo ni tawh bawk.

MLS club LA Galaxy-a football chawlh-santu defender hian Portuguese first division club Olhanense-ah a coaching career bul a ṭan a, thla thum chauh a cham hman tihin Portugal second division club Farense-ah thla nga a cham leh a, nikum July aṭanga September thla thleng kha Portugal second division club tho Aves-ah a hun a hmang leh a ni.