Zanin dar 1:15-ah League Cup semifinal Manchester City Vs Everton

Goodison Park-ah Everton-in Capital One Cup semifinal first leg-ah Manchester City 2-1 in an hneh a, zanin dar 1:15 hian Eitihad Stadium-ah second leg khelh a ni dawn a, Ten Action-ah a en theih ang.

Everton-in an player pawi-mawh midfielder Muhamed Besic leh winger Kevin Miral-las te chu Pathianni zana Swan-sea an hneh loh ṭumin an inhliam a, City an hmachhawn thei dawn lo. Amaherawhchu Toffees hian goal khat nei chungin City an tlawh dawn a, kar hnih liam ta khan zanina an khelhna tur hmunah hian goal awm loa Manuel Pellegrini hote league lama an draw tawh bawk avangin Roberto Martinez hote hian final thlen a theih tih an chiang ang.

Mancheter City tan League Cup nomawi hi Everton ken mai chi a ni lo. Tunah hian City hi inelna paliah champion thei an ni a, chung zinga hlu lo bera ngaih Capital One Cup hi a awlsam ber tura ngaih a ni lawi si.

City defender Nicolas Ota-men-di chuan, "Everton hi team ṭha an ni a, vanneih vanga semifinal thleng an ni lo. League-ah pawh khel ṭha a, khualmualah vawi khat chauh an chak lo. Inkhel harsa tak a ni dawn a, supporter ṭanpuina kan mamawh lehzual dawn a ni," tiin final luh a awlsam loh tur a sawi.

Everton ṭhatna hi City tan buaina a ni a, Manuel Pellegrini hote harsatna belhchhahtu captain Vicent Kompany inhliam a ni. Inrinni khan Upton Park-ah West Ham 2-2 in an draw a, an goal hnih chhuahna hi Argentine defender Otamendi-a'n a hna a tlin tawk loh vang a ni.

Premier League-ah City-in hmahruaitu Leicester City point thum in an pha lo a, team boruak ti ṭha turin League Cup final thlen a pawimawh. 2014 League Cup champion innghahna tur chu match hnuhnung pahniha goal li khung thei Sergio Aguero a ni ang.

Everton-in 1995 FA Cup final-a Manchester United an hneh hnuah nomawi an la chawi leh lo. Toffees hian 1977 leh 1984 khan final an lo thleng tawh a, Aston Villa leh Liverpool an hneh lo. Tun hi League Cup champion theihna hun ṭha a ni a, first leg chak tawh Martinez-a hote tan bawhpelh chi a ni lo.

League Cup kalphung

• Semifinal hi team pahnih khelmuala khelh a ni.

• Minute 180 chhungin away goal rule a awm lo a, semifinal match hnih khelh zawha an inhnehtawk a nih chuan extra time khelh tur a ni.

• Extra time aṭang chauhin away goal rule hman ṭan tur a ni.

• Zanin hian hun pangngaia Manchester City goal khata an chak chuan extra time khelh tur a ni.

• Extra time-ah goal a luh tawh loh chuan Everton khel-muala goal khat khungtu Manchester City an chak ang.

• Zanin hian penalty shootout kan hmu dawn a nih chuan City hi 2-1 a an chak a ṭul ang.