Semifinal-ah Federer Vs Djokovic

Australian Open khelh mekah inkhel hmuhnawm leh ropui kan hmu thei dawn a, semifinal-ah Roger Federer leh champion lai Novak Djokovic an inhmachhawn dawn. Player ropui pahnih hian Zirtawpniah semifinal hmasa zawk an khel ang.

Swiss thiampuipa leh Serbian chhuan-vawr te hi tun hma-in vawi 44 an lo inhmachhawn tawh a, vawi 22 ve ve hnehna changin record thlirin chungnung zawk an awm lo.

Semifinal kalkawng

Rod Laver Arena-ah seeded pathumna Federer chuan Tomas Berdych lakah darkar hnih leh minute ruk chhungin 7-6, 6-2, 6-4 in a chak a, Melbourne Park-a vawi 80 hnehna a channa chiah a ni. Australian Open-ah Federer-a'n record a nei ṭha a, tun ṭum hi kum 13 chhunga a vawi 12 semifinal luhna a ni.

Grand Slam vawi 17 cham-pion tawh Federer chuan, "Hnehna ka chan avangin ka lawm a, ka hlim takzet. Tun hnaiah Berdych hi khelh a harsa ka ti ṭhin hle a, min ti mangang ṭhin hle bawk. Min nawr nat bakah tihsual a nei tam ngai lo kha a ṭhatna lai tak chu a ni. Ka vanneih ni a a nih avangin hnehna ka chang hram," tiin a dan pangngaiin a inngaitlawm leh hle.

Nimin vek khan world number 1 Djokovic chuan world number 1 Kei Nishikori chu 6-3, 6-2, 6-4 in a hneh. Semifinal thlir nghalin kum 28-a upa Djokovic chuan, "Federer hi khawvela player ṭha berte zinga mi a ni a, ka zah hle. Ani nena inhmachhawn hi chu ka tan chona thar a ni zel. Inkhel hautak hmachhawn turin ka inbuatsaih nghal ang," a ti.

Wawrinka hun a liam

Kum 2014 champion Stan Wawrinka chuan last 16 a paltlang zo lo a, Thawhṭanni khan Milos Raonic lakah darkar thum leh minute 44 chhung an inkhelh hnuah 6-4, 6-3, 5-7, 4-6, 6-3 in a tlawm.

French Open champion lai Wawrinka lakah hian Raonic a khel ṭha hle a, vawi 24 ngawt ace a siam thei a ni. Vawiin hian quarterfinal khelh zawh a ni dawn. Tlai dar 2:00-ah Wawrinka hnehtu Raonic leh French player Gael Monfils an inkhel ang a, chawhma dar 9:00-ah British star Andy Murray leh Spanish player David Ferrer te an inhmachhawn bawk ang.