Champion lai Mizoram hmaah West Bengal

National Junior Football Championships for BC Roy Trophy chu kum hnih chhung khelh a nih loh hnuah kumin hian Punjab-ah khelh a ni dawn.

Mizoram team chuan Thawhṭanni khan inelna hmun hi an thleng a, 2013 champion hian Dinthar FC coach Lalremtluanga leh Chanmari FC coach hlui Lalchhuanawma Pautu (LCha) te kaihhruainna hnuaiah nomawi humhim an tum ang.

BC Roy Trophy vawi 50-naah hian team 16 te chu group paliah ṭhen hran an ni a, a sang ber ṭheuhin semifinal an lut ang. Mizoram group-ah hian West Bengal, Meghalaya leh Karnataka an awm a; Meghalaya leh Karnataka an inhnuhdawh avangin champion lai hian inelnaa record nei ṭha ber West Bengal nen semifinal lut tur an zawng dawn.

Mizoram leh West Bengal hian January 28 chawhma dar 11:00-ah first leg an khel ang a, January 30-ah second leg an khel leh ang. India ram junior inelna hi tier hniha ṭhen a ni a, Mizoram telna hi tier 1 niin team ṭha 16 thlan chhuah an ni a, tier 2 erawh team hnufual dah khawm an ni thung.

Thlirletna

Mizoram hi kum 2013 khan a vawi khatna atan Ranchi, Jharkhand-ah India junior inelnaah hian an champion a, final-ah ṭhenawm state Assam chu 6-1 in an sawp.

Hmingthansanga (manager) leh L. Jonathan (coach) te kaih-hruai Mizoram hian champion kalkawngah harsatna an tawk lo a, group stage-ah Uttar Pradesh (5-2), Haryana (9-0) leh Orissa (7-2) te an sawp hnuin semifinal-ah Punjab chu 3-1 in an hneh leh a, tarlan tawh angin final-ah awlsam takin hnehna an chang bawk.

Mizoram result ṭha neih hi player-in an hlawk pui a, khami ṭuma Mizoram midfielder Malsawmzuala chu tun season I League-ah Bengaluru tan a la inlan vek a, Jerry Mawihmingthana leh Vanlalremkima ten DSK Shivajians Liverpool Academy an zawm a, player tam zawk hi MPL-ah player pawimawh an ni chho bawk.