India-in gold medal lak belh

Asian Games 2023 neih laiah India nula silai kap thiam Sift Kaut Samra chuan 50m rifle 3-position huangah gold medal a kap chhuak, pakhatna ni satliah loin world record a siam hial.

Samra-i hian point 469.6 a hmu a, a point score hi Asian Games mai ni loin world record a ni hial. Amah ang bawka India aiawhtu Ashi Chouksey chuan point 451.9 hmuin bronze medal a hlawh chhuak ve bawk. Pahnihna chu a thlengtu China mi Qiongyue Zhang a ni thung.

India tan hian silai kah huangah bawk - hmeichhe pathum Manu Bhaker, Esha Singh leh Rhythm Sangwan te chuan women's 25m pistol team inelnaah gold medal an la ve bawk a, nimin tlai thleng khan India hian gold medal pathum a la tawh a ni.

China chuan gold medal ringawt pawh 68 a la tling tawh - Asia khawmualpui chhunga ram dangte lakah China a sang fal a, infiamna peng hrang hrangah an tel hnem bakah infiammi an nei ṭha bawk, khawvel huap pawha USA elphak bertu an nihna a lang.