Major General VK Nambir-a'n Aizawl Grassroots Centre a hawng

Nimin khan Lammualah Major General VK Nambir, YSM, SMIGAR (East) chuan Mizoram Football Association (MFA) Grassroots Centre mumal zawka kalpui tur chu hawngin pawisa fai cheng singnga a hlan nghal.

Aizawl Grassroots Centre hawnnaa khual lian Major General VK Nambir chuan, "Lammuala tualchai tawh ṭhinte ram tana khel chho phak an awm tih ka hriat hian ka lawm. MFA-te nena naupang talent nei ṭhate haichhuah kawnga an thawk dun thei hi ka lawm hle. Tuna inzir mekte hi India tan leh club ṭha tak tak tana khel chho turin duhsakna ka hlan a, ram pawn club hiala inkhelh hi ka duhpui che u a ni," tiin a sawi.

MFA hony. secretary Lalnghinglova Hmar chuan, "Assam Rifles ten an khelmual phal taka MFA an hman tir hi a lawmawm. Football Coach ṭha tak takten naupangte chu a tunlai thei ang berin football khelh dan an zirtir dawn a, Assam Rifles sipai fate pawh he Grassroots Centre-ah a tam thei ang ber lo tel turin kan sawm a che u," tiin a sawi a, eizawnna hmang thei tur player an chherchhuah ngei a beisei thu a sawi bawk.

MFA chuan Major General VK Nambir, IGAR (East) bakah hun hmanpuitu Brig. Girish Upadhya, DIG, 23 Sector leh Col. Mukesh Sauhta, CO, 2AR te hnenah ngaihhruihna thilpek an hlan.

Lammualah Grassroots Centre hawn a ni leh ta a, MFA chuan mumal takin Lammualah Grassroots Coach-te kaihhruaina hnuaiah naupangte tan football zirna a kalpui leh thei tawh dawn. Training hi tlai lamah naupang school ban-a neih ṭhin tur a ni.

Grassroots Centre hawnnaah hian football zirlai naupang leh an nu leh pa te bakah MFA hruaitu ṭhahnem tak an tel. MFA hian Reliance Foundation thawhpuiin, kum bithliah hrang hrang mipa leh hmeichhe naupangte tan District paliah Naupang League a kalpui bawk a, coach ṭha kan mamawhzia hriain All India Football Federation (AIFF) nena ṭangdunin Coaching Course a buatsaih ṭhin bawk.