Saudi kan huphurh lo - Ayush

India Under 23 midfielder Ayush Chhetri chuan Asian Games round of 16-a an hmachhawn tur Saudi Arabia U23 chu an hlauh bik loh thu a sawi a, fimkhur erawh a ṭul tur thu a sawi lang.

India hian an match hmasa berah China chu 5-1 in ngam lo mahse Bangladesh (1-0) leh Myanmar (1-1) laka point an hlawh chhuah avangin round of 16 an lut a, vawiin tlai dar 5:00 hian Saudi Arabia nen an intawng dawn.

Dinthar tlangval Ayush chuan, "Kan game hmasa aṭanga teh chuan a harsa ang tih ka ring a, mahse, Saudi Arabia hi ka huphurh hran lo. Kan team boruak pawh a ṭha a ni," a ti a, rin hlawh zawk team lakah theihtawp an chhuah tur thu Vanglaini a hrilh.

Ayush chuan sawi chhunzawmin, "Saudi lam hi chu an inpuahchah ṭha a, keini kan inpuahchah ṭha tawk lo thung. Chu chu team pahnih inthlauhna ni berah ka ngai. Practice pawh nei hman loin inelna kan hmachhawn a, a tam zawk chu vawi khat mah la khel ho ngai lo kan ni," a ti.

India squad-ah hian FC Goa midfielder Ayush bakah East Bengal defender Lalchungnunga chu Mizoram player tel a ni a, Asian Games-ah Mizoram player-ten India tan theihtawp an chhuah.

Chungnunga pawhin Ayush-a ngaihdan ṭawmpuiin, Durtlang tlangval chuan, "Saudi ka huphurh hran lo. Team ṭha lo zawka ngaih kan ni a, mahse, hei tak hi kan tan a ṭha thei - pressure nei miah loin kan khelh theih phah dawn a, a phurawm tawh khawp mai," tiin Vanglaini a hrilh.

Saudi hian match thum an khelhah tlawm nei loin last 16 hi an lut a, tun hnaia Saudi Pro League club-ten player langsar lakluh nana sum an hman hnem avangin Saudi football hian ngaihven a hlawh thar hle - chutihlaia India lo ngam loh chu an duh dawn lo.

Sunil Chhetri hoa khel India tan Al Nassr-a Cristiano Ronaldo te nena khel ho Mohammed Maran hi ven bik tur a ni dawn a, kum 22 mi forward hi an ram senior team tan pawha khel phak a ni.

Asian Games football-ah hian team tinte chu an squad-ah kum 23 chung lam player pathum an awm phalsak an ni a, mahse, Saudi Arabia hi an inringtawk - an squad-ah kum 23 chung lam pakhatmah an awm lo! Vawiinah India laka chak an beisei ngam ang.