Man United an insiamṭha ta?

Carabao Cup third round-ah Manchester United-in Premier League club Crystal Palace an hmachhawn chungin 3-0 in hnehna an chang a, harsatna hranpa nei loin fourth round an lut.

Old Trafford-a inkhelah mualneitu tan Alejandro Garnacho leh Casemiro ten first half-ah an khung a, Anthony Martial-a'n second half-ah a khung leh bawk. Palace-in goal an khung lo a, André Onana-a'n match zawnin a 'clean sheet'.

Goal thum chu

Man United-in tun season-ah goal khung an harsat a, Crystal Palace lakah erawh an theihna an lantir ta. Minute 21-naah Garnacho-a'n a khung a, team goal a ni.

Garnacho hian vei lam kilah ball changin Mason Mount a pe a, English midfielder hian box dinglama awm Facundo Pellistri a pe. Pellistri hian amah thlawp tura lo tlan lut Diogo Dalot pe lehin, Dalot-a cross chu Garnacho-a'n a khung.

Man United-in tlarhnung pui turin Casemiro an lalut a, Brazilian midfielder hi tun season-ah chuan goal khung kawngah tha a thawh hnem zawk. Minute 27-naah Mount-a corner pet chu Casemiro-a'n a tauh goal a, tun season-a goal lina a ni der tawh.

Minute sarih chhungin United-in goal hnih a khung a, goal luh inkarah Dalot leh Pellistri ten inhliam vanga chhuak Dean Henderson thlaktu Sam Johnstone hna an siam ve ve bawk.

Second half-ah Casemiro ball vawrhluh tawih zet chu angle zim tak aṭangin Martial-a'n minute 55-naah a khung. French forward Martial-a'n tun season-a a goal hmasa ber a khung ve chauh a, Man United chet ṭhat chhunzawm nan an tlarhmate an chet ṭhat hi a pawimawh hle.

An insiamṭha

Man United hi match thum chhung an chak lo zawn a, match nga chhungin vawi li an chak lo. Tunah erawh a zawnin an chak a, goal an chhuah lo ve ve.

Palace an hneh ṭuma United tana chanchin lawmawm chu player thar Mount a khel ṭha a, loan hmanga an hawh Sofyan Amrabat pawh left back-a dah a nichungin a khel ṭha - United ṭantute tan lawmna tham a tling.

Ten Hag-a'n Burnley hnehtu aṭangin player pasarih an thlak. Amrabat chuan, "Manager bulah mamawhna hmun apianga chhawr theih ka nih thu ka hrilh. Left back ni mah ila, ka zalen thung," tiin a sawi. Palace lakah pawh hian Amrabat hian midfield hna a thawk hnem hle.

Manchester United hian Old Trafford-ah Palace bawk an mikhual leh nghal dawn a, United leh Eagles hi September 30, Inrinni zan dar 7:30 hian an inkhel lehnghal ang.