Mizo tamna Odisha khelmualah Mumbai
ISL club zinga Mizoram player kawl hnem ber chu Odisha FC an ni a, Mizo player pakua ngawt an kawl - zanin dar 8:00-ah hian Odisha hian an league match hnihna an khel dawn a, Mizo pathum awmna Mumbai City an mikhual dawn.
Odisha hian goalkeeper Lalthuammawia Ralte, defender Jerry Lalrinzuala, Laldinliana Renthlei, Lalliansanga Renthlei, midfielder Isaac Vanmalsawma, K. Lalṭhathanga, Paul Ramfangzauva, forward Isak Vanlalruatfela leh Jerry Mawihmingthanga te an kawl!
Tun season ISL-a an match hmasa berah Odisha hian an mikhual Chennaiyin chu 2-0 in an hneh nghal a, Mizoram player pali ngawtin bul an ṭan. 4-2-3-1 formation hmangin tlarhnungah Jerry a awm a, Jerry Mawia, Puitea leh Isak-a te Roy Krishna hnungah an intlar - Dinliana chu bench aṭangin a lut bawk.
Odisha goal hmahruai hi Jerry Mawia khung a ni a, AFC Cup-ah Mohun Bagan ngam loin mualpho mah se Sergio Lobera naute hi an insiamrem rang hle - Lobera hi Mumbai boss hlui a ni a, Spanish coach hian a club hlui lakah hnehna chan ngei a duh dawn.
Zaninah pawh Lobera hian Mizo player a chhawr leh nualin a rinawm a, Mizo tam takin an ṭan rawn leh dawn - mahse, zanina an hmachhawn tur hi Lallianzuala Chhangte khelhna an ni tih theihnghilh loh a ṭha.
Odisha forward Isak-a chuan, "Mumbai hmachhawn ka châk a, coach-in min duhsak ngei pawh ka beisei. Team ṭha an ni a, a bik takin Mizo leh India ang pawha top ni mek Lz-a te khelhna a nih avangin hmachhawn ka châk lehzual a, phur pawh ka phur hle a ni," tiin Vanglaini a hrilh.
Mumbai hian Lianzuala bakah Lalengmawia Ralte (Apuia) leh defender Hmingthanmawia (Valpuia) an kawl a, ṭum dang ang thoin LZ-a leh Apuia te chu bul ṭan tura beisei an ni.
Mumbai City hian an match hmasa berah NorthEast United chu 2-1 in an hneh nghal a, Jorge Pereyra Diaz chuan goal hnih hi a khung - zaninah pawh Odisha tan ani hi ven bik a ṭul dawn a, Lianzuala pawh a hnawksak leh khawp ang.
Chutihruala hriat tel tur chu Mumbai hian kar leh Thawhlehni zanah AFC Champions League match khelh tur an nei lehnghal dawn a, khualmualah Uzbek club ṭha Navbahor an lenchilh dawn - match hmasa berah Nassaji Mazandaran (2-0) an ngam loh bawk si avangin fimkhur a ṭul a, coach Des Buckingham tan player rem dan turah fimkhur a ṭul dawn.