Bayern an chak nuamsa

Bayern Munich chuan September 26, Thawhlehni khan Preussen Muenster chu 4-0 in an sawp a, DFP Pokal second round an lut. German Cup first round hi August 12-13, 2023 khan khelh a ni a, DFL Supercup a awm avangin Bayern leh an khingpui RB Leipzig inkhelh hun an sawn. Nizan khan Leipzig-in Wehen Wiesbaden an hmachhawn a, result kan hre hman lo.

Bayern ṭantute chuan fixture sawn hun an duh lo a, an lungawi lohna lantir nan first half-ah tennis ball 100 chuang field-ah a vawm lut a, inkhel pawh chawlh lailawk a ngaih phah hial.

Inkhelah Bayern tan harsatna a awm lo a, Bochum laka hattrick siamtu Harry Kane an dah ṭha chungin 4-0 in an chak. Bavarians tan Eric Maxim Choupo-Moting, Konrad Laimer, Frans Krätzig leh Mathys Tel ten goal khat ṭheuh an khung.

Kum 20 mi Kratzig hi left back a ni a, Bochum lakah bench aṭanga lutin tun hi inkhel bul a ṭan hmasak ber a ni a, goal a khung nghal. Kum 18 mi Tel erawhin nikum khan Rennes aṭangin Bayern hi zawm a, nikum pawh khan league match 22 khelin goal nga a khung.

Tun season-ah Tel hi a la khel ṭha lehzual a, Bundesliga-ah vawi khatmah inkhel bul a la ṭan lo chungin match nga aṭangin goal thum a khung. Inelna hrang hrangah Tel hian goal a khung tawh a, assist vawi hnih a tawh - hmabak a nei êng hle.