Juventus chakna Arkadiusz Milik

Arkadiusz Milik-a goal khat hmangin Juventus chuan Thawhlehni zan khan an mikhual Lecce chu 1-0 in an hneh a, tun season Serie A match vawi ruk an khelh aṭanga point 13 hmuin table chung lamah an invawrh chho.

Turin khawpuia Allianz Stadium-a inkhelah Juve hi team ṭha zawk ni mah se Lecce an inveng thiam hle a, point hlawh pawh an beisei sang viauin a rinawm. Mahse, minute 57-naah Milik chuan inkhela goal awmchhun a khung.

Old Lady tan Federico Chiesa chuan goal khung lo mah se a hmuhnawm a, Italian forward bakah France international midfielder Adrien Rabiot leh Weston McKennie te chuan Leece keeper Wladimiro Falcone tan hna hautak an siamsak vek.

Juve hian hrem lailawk vangin Paul Pogba an chhawr thei lo, an midfielder hi Manchester United aṭanga an neih let hnuah an la chhawr mumal meuh lo, tunah hian hun rei tak chhung hrem theih dinhmunah a ding mek - a tel loa team rem thiam chu a finthlakin a rinawm.

Italian club ṭha Juventus manager Massimiliano Allegri chuan, "Kar tawpah Sassuolo nen inkhel hautak kan hmachhawn a, khualmualah 4-2 in kan tlawm a nih kha, tunah Leece laka hnehna kan chang zui thei mai hi a lawmawm.

"Inbuatsaih nan hun a tlem a, mahse team dang pawhin hun an ngah bik lo. Tun kar tawpah Atalanta kan lenchilh leh nghal dawn, kan fixture neih dan chhut chuan ni khat lek pawh hahdam hman kan ni lo," tiin a sawi.

Juve hi table-ah pahnihna an ni rih a, hmahruaitu Inter Milan aiin point hnihin an hniam. Mahse, team dang aiin Allegri naute hi match khatin an khel hnem, nizan inkhel result a zirin an dinhmun a danglam lehnghal thei ang.