Safiullin hnehin Zverev a champion

Alexander Zverev chuan a ṭha thei ang bera season khar a tum a, kawng dik a zawh mek zel. German tlangval hian Thawhlehni zana khelh zawh tak Chengdu Open final-ah Roman Safiullin hnehin a champion.

Center Court-a inkhelah Zverev hian awlsam takin hnehna a chang bik lo, set khatna tie break an khelh hnuah a hniam zawk phawt, mahse set a hloh hnuah tho chhuak lehin 6-7(2), 7-6(5), 6-3 in a chak.

Kum 26 mi Zverev chuan, "Ka hmuh dan chuan Safiullin khan tournament a hmang ṭha takzet, tennis tournament a khelh tawh zinga a tih ṭhat ber a la ni hial mai thei, final thleng tura a kawng zawh te kha a ṭha hle.

"A hneh zingah seeded palina Dan Evans leh seeded pahnihna Lorenzo Musetti te an tel, final-ah pawh vannei se la chuan chak thei a ni. Ka champion hi ka khelh ṭhat zawk vang ni loin ka vanneih vang a ni," tiin a sawi.

Zverev hi tun dinhmunah world number 10 a ni leh tawh a, season tawpa a thiam zual pariat inelna ATP Finals khelh phak tumin beiseina a la nei - Grand Slam champion la ni lo mah se tournament dangah erawh vawi 21 a hlawhtling tawh thung.