Qatar League an lang ve leh ta'; Tute nge khel?

European top five league-ah transfer bazar an khar a, Europe pawn lam aṭanga thawm rawn nei na tak Saudi Pro League lamah transfer an khar bawk - transfer thawm a reh ṭhiap lai takin Qatar lam an rawn lang a, an thawm a na hle.

September 18 khan Qatar lam hian transfer an khar ve chiah a, an player lakte avangin lo theih lohin football khawvel lamin Qatar-ah mit a len - tunlai football chu middle east sum mawmin football khawvel a run a ni ber.

Hetihrual hian Asia tan chuan hei hi thu lawmawm a ni. AFC Champions League-ah khawvel huap player langsar an tam sawt dawn tihna a ni a, football khawvelin a duh emaw, duh lo emaw Asian Champions League chanchin a ziah fo a ngai tawh dawn.

Mizo tlangvalte pawhin Neymar-te ho nen chak zawk nih inchuhin khelmual an lut ho tawh dawn tihna a ni a, mi tam tak chuan European football-in South American football ropuina sum hmanga run a, ropuina an chhuhsak hunlai nen khan an khaikhin leh der tawh.

Hman leh tun

Qatar hian tun hnaiah player langsar an rawn la thut a ni hran lo a, football ngaina tak ram, sum leh pai ngah bawk si hian tun hma pawhin European football-a player langsar tak takte chu contract mawm zawk nen an lo thlem lut fo tawh.

Netherlands international ṭhin Nijel De Jong, Bayern Munich striker hlui Mario Mandzukic, Arsenal chhuanvawr ni ṭhin Santi Cazorla, Cameroon legend Samuel Eto'o, French defender ropui Marcel Desailly, Inter Milan midfielder hlui Wesley Sneijder, tuna Barcelona boss Xavi Hernandez, freekick specialist Juninho, Netherlands international hlui Frank de Boer, Real Madrid legend Raul Gonzalez, Argentine striker ropui Gabriel Batistuta leh tuna Manchester City boss Pep Guardiola te pawh hi an lo khel tawh ṭhin.

Mahse, 'tun' leh 'hman' hian danglamna a nei. Tun hmaa Qatar-in player an thlem luhte kha chu chawlh hnaih tawh, career mangṭha hma kuma sum tam tak seng luh duhte kha an ni a, an vanglai an pel tawh tihah Qatar an pan.

Tun hnaia Qatar pantute erawh European football-a an vanglai hun hmang mekte an ni hlawm a, Julian Draxler leh Marco Verratti te hoin European football ropuina mangṭha a, Saudi lam ai pawha an thlan a nih avangin ngaihven a hlawh lo thei lo.

A kalphung

Qatari football danglamna chu club pakhatin ram pawn player pasarih aia tam an kawl thei lo chu a ni a, player pasarih zinga pahnih chu Under-21 player an nih a ngai bawk - hei vang hian sum ngah viau mah se Qatar club-ten an duh angin player langsar an la lut thei lo zawk.

World Cup 2022 thlengtu Qatar rama league sang berah hian team 12-in inelna an hmachhawn a, an inkhelh kual vek hnua a sang ber chu champion an ni ṭhin. Team 12 zinga a mawngphah luahtu chu division hniam lamah an tla a, table-a 11-nain relegation playoff an khel thung.

Qatar club-ten sum leh pai ngahin, khelmual chhung leh pawnah hmasawn viau mah se, an stadium len zawng erawh khawthlangte nen khaikhin rual a la ni rih lo - stadium lian ber chu Al Rayyan khelmual Ahmad bin Ali Stadium a ni a, mi 47,343 an leng.

Stadium te ber chu Al-Markhiya Stadium a ni a, mi 200 an leng! He stadium hi Al-Markhiya khelmual a ni a, stadium tê ber dawt hi Al Shamal khelmual niin, mi 5000 an leng thung a ni.

Hello Verratti!

Tun nipuia Qatar panah chuan Marco Verratti hi a langsar ber, tia sawi ngam a ni. Paris St-Germain midfielder hian French club chhuahsanin Al Arabi a zawm a, Qatar club hian a man atan euro maktaduai 45 ngawt an seng - sum an ngah tih a chiang.

French midfielder hian season hnih chhung atan contract a ziak a, Italian chanchinbu La Gazzetta dello Sport-in an tarlan dan chuan kum khatah euro maktaduai 35 vel a hlawh dawn - Qatar a pan chhan a chiang viauin a hriat.

Al Arabi-a Verratti khelhpui tur zingah Tunisia tana vawi 93 zet inlan tawh Youssef Msakni, Barcelona, Inter Milan leh PSG tana khel tawh Rafinha, Borussia Dortmund leh PSG centre back hlui Abdou Diallo te an awm.

Kum 21 mi Mohamed Taabouni pawh Feyenoord tana khel tawh a ni a, kum 18 mi Espanyol centre back hlui Simo Keddari pawh hi Spain tana Under-17 leh U19 inlan tawh a ni a, kum 21 hnuai lam foreigner pahnih an neih pawh Al Arabi hian an nei langsar hle.

A langsar dang

Germany tana vawi 58 ngawt inlan thei Julian Draxler hian World Cup nomawi hial chawi tawhin, FIFA Confederations Cup-a an champion ṭum phei chuan Best Player a ni hial. Mahse, tun season-ah chuan Qatar club Al Ahli tan a khel dawn a, PSG a thlah.

Draxler hian Sporting Lisbon midfielder hlui Idrissa Doumbia a khelhpui dawn a, Al Duhail chuan nipui transfer-ah Philippe Coutinho an la bawk. Barcelona midfielder hlui bakah hian South Korea international Kim Moon-hwan, Porto defender hlui Ruben Semedo leh season hmasa lawka Southampton tana khel Ibrahima Diallo te chu an player neih langsar an ni.

Al Gharafa winger Yacine Brahimi hi Porto tana hming lo chher tawh a ni a, Boavista forward hlui Yusupha Njie chuan Al Markhiya tan a khel a, Sporting Lisbon attacking midfielder ṭhin Rochinha nen an club khelhna a inang.

Lyon defensive midfielder Thiago Mendes chuan nipui transfer-ah Al Rayyan a zawm a, Leeds United aṭangin Rodrigo chuan a zawm ve bawk - Corinthians tana season hmasa lawka goal 21 ngawt khungtu Róger Guedes pawh Al Rayyan hian an thlem lut.

Xavi club hlui!

Deportivo La Coruna midfielder hlui Guilherme Torres chuan Xavi club hlui Al Sadd tan a khel a, kum 28 mi left back an kawl Paulo Otavio hian season hmasa lawk khan Wolfsburg tan Bundesliga a la khel.

Colombia international Mateus Uribe chu Porto aṭangin an thlem lut a, tun nipui thoa an lakluh Gonzalo Plata hian season hmasa kha Real Valladolid tan a la khel - kum 18 mi an kawl Ilyes Housni lah PSG academy aṭanga inzir chhuak a ni.

Inter Milan centre back ṭhin Jeison Murillo chuan July khan Al Shamal a zawm a, kum 26 mi Bruno Tabata pawhin Sporting Lisbon thleng thlengin a hming lo chher tawh mah se tun season-ah Qatar SC a zawm.

Bayern Munich midfielder lar Javi Martinez pawhin 2021 aṭang khan Qatar SC tan a khel tawh a, Kenji Gorre pawh Manchester United academy chhuak niin, Umm Salal zawmtu Andy Delort hian season hmasa khan Ligue 1 lamah Nice tan a la khel.

Tute nge coach?

Qatar-ah player langsar tak tak an khel nual a, coach pawh an hraw hlawm hle. Hernan Crespo kan la hre hlawm em aw? Khawvela footballer man to ber pawh lo ni tawh, Argentine striker ropui ṭhin hian Qatar club langsar zinga mi Al Duhail a enkawl mek.

Al Gharafa coach Pedro Martins hi Olympiakos boss hlui a ni a, Greek club ṭha hi Super League Greece-ah vawi thum ngawt a champion pui thei. Al Markhiya boss Anthony Hudson hi USA assistant coach ṭhin a ni a, Al Wakrah boss hlui Tintín Márquez hi Espanyol boss hlui a ni.

Atletico Madrid boss hlui Jose Murcia pawhin hlawhtlinna zawngin Qatar club Muaither SC a enkawl a, Qatar SC enkawltu, Morocco international hlui Youssef Safri hian coaching lamah tawnhriat la nei tam lo mah se a vanglaiin Norwich City leh Southampton tan a lo khel tawh.

French boss Patrice Carteron hian Europe-ah hriat hlawh lutuk lo mah se Moroccan club lar Raja CA, Egyptian club ṭha Al Ahly leh Zamalek, Saudi club Al Nassr leh Al Ettifaq lo enkawl tawh niin, Umm Salal a enkawl mek a, Leonardo Jardim hi 2016-17 season-a ropui taka Ligue 1-a AS Monaco champion puitu kha a ni - June thla khan Al Rayyan chu kum hnih chhung atan a zawm.