Mallorca mualah Barcelona an chak zo lo

Barcelona-in La Liga-ah an elpui Real Madrid kalsan falna remchang nei mah se an hun ṭha neih an chhawr thei lo a, khualmualah Real Mallorca chu 2-2 in an inhnehtawkpui.

Mallorca hian Vedat Muriqi leh Abdon Prats hmangin vawi hnih ngawt hma an hruai a, mahse, Barca hian Raphinha leh Fermin Lopez hmanga chhangletin, si phurh an sut zo a, goal dang erawh an khung thei ta bik lo a ni.

Thawhlehni zan La Liga inkhel dangah Sevilla chuan 5-1 in Almeria an sawp bawk - Sevilla tan Youssef En-Nesyri, Dodi Lukébakio, Suso, Erik Lamela leh Enrique Salas te chuan goal khat ṭheuh an khung a, Almeria tana Luis Suarez penalty khungin awmzia a nei phak lo.

Barca an chesual

Mallorca khelmualah Barcelona an chesual a, goalkeeper Marc-Andre ter Stegen tihsual zarzoin Vedat Muriqi chuan Antonio Sanchez-a siamsak chu goal-ah a chantir - Barcelona ṭantute an hawihai.

Catalan club-in tlawm an tum lo tih pholangin Raphinha hmangin an khung zui ve leh a, minute 41-na a ni. Mahse, Barca hlim chhung a rei lo. First half hun pek belhah Abdon hmangin Mallorca hian an khung ve leh a, 2-1 a ni.

Barca hian kar hmasa league inkhelah Celta Vigo chu 3-2 in an hneh a, minute 80 thleng chu goal hnihin an hnufual hman. Mahse, 'comeback' ropui lantirin, 3-2 in an chak a, fan-ten team huaisen Barca hmuh nawn an duh.

Mahse maw...

Second half-ah Barca fan-ten an team 'comeback' lai hmuh an duh a, an beisei angin minute 75-naah goal an hmu - bench aṭanga luhtir Fermin Lopez chuan si phurh sutna goal a khung a, Raphinha siamsak a ni.

Kum 20 mi Lopez tan Barca jersey ha chunga a goal khung hmasak ber a ni a, Spanish footballer ṭhangduang tan zan chhinchhiah tlak a ni - mahse, goal dang an khung zui loh avangin 2-2 in inkhel a tawp a, hun pek belha Mallorca right back Pablo Maffeo hnawhchhuah chhawr turin hun a tam tawk tawh lo.

Nizan khan Barca elpui Real Madrid an inlan a, result kan hre hman lo. Zanin dar 1:00-ah Atletico Madrid chuan khualmualah Osasuna an lenchilh ve leh bawk ang.