Congress-in Adani Group chhui ngam loah SEBI puh

Congress general secretary (communication) Jairam Ramesh chuan Adani telna shell company, Opal Investment te dan kalha an chetna a tam thu sawiin, Securities and Exchange Board of India (SEBI) chu Adani Group tihdik loh sawi tam tak awm chhui chiang ngam lo leh, Adani Group puhna chungchangah chuan Joint Parliamentary Committee (JPB) chhuina chauh an rin tur thu a sawi.

Ramesh chuan thil dik tawk lo a lan chhuah belh zel thu sawiin, Adani Group hnuaia power siam chhuahna lam buaipuitu, Adani power hlutna aṭanga Rs. vbc 8,000 chu May 2019 khan Dubai-a mimal enkawl firm pakhat hminga dah vek a nih thu a tarlang.

"Dubai-a mi pakhat enkawl firm ringawtin Adani power hlutna 4.7% (Rs. vbc 8,000) lai mai a chang hian zawhna a titam hle. Adani power hi India-a mimal enkawl power siam chhuaktu lian ber a ni. Opal pawh hi Adani peng tho, Indian security law pumpelhna atana hmanruaa an hman niin a lang," tiin Ramesh chuan Adani Group-in heng zawng zawng an tihchhan leh pawisa neitu dik tak chu tunge tiin a zawt.

Congress GS Ramesh hian Adani group chhui tura SEBI an muang em em leh an ip tlat chuan heng zawhna zawng zawng chhanna hi a pek theih loh thu sawiin, Congress thil phut, Adani Group chhui chiang tura JPC neih chu a ṭul thu a sawi."Adani dan bawhchhiat tam tak chungchangah hian thu dik hai lang a, hmasawnna nei tur chuan JPC -in an bawhzui a ngai tawh a ni," a ti.