Newcastle-in Man City an pet tla

Newcastle United manager Eddie Howe-a'n Carabao Cup-ah season liam ta aia chet ṭhat hret a duh a, inelna hnuhnung berah final an thlen avangin kuminah chuan champion an duh tihna a ni.

Magpies hian nomawi chawi ngei an duh tih lantirin Carabao Cup-a record nei ṭha leh Premier League hmahruai mektu Manchester City chu 1-0 in an hneh a, League Cup aṭangin an pet tla. Newcastle hian Alexander Isak goal hmangin City hi an hneh a, team pahnihin player siksawi nual ve ve mah se chak chu chak a ni tho tho.

An inthlak nasa

League Cup champion hi a hlu a, chutihrualin nomawi chawi theih pali zinga ngaih hlut loh ber a ni thung. Season tawpah club-in nomawi kawng an zawhpui ṭhin a, League Cup nomawi erawh kawng an zawhpui ngai lo.

Chutihrualin League Cup hi Man City-in season liam taa quadruple theih lohna chhan kha a ni a, nomawi dang pathum erawh an chawi vek. Pep Guardiola-a'n kartawp inkhel aṭangin player pariat ngawt a thlak. Manuel Akanji, Joško Gvardiol leh Julian Alvarez te chauhin bul an ṭan nawn. Rodri erawh Nottingham Forest an hneh ṭuma hnawhchhuah a nih avangin hremna a hmang ṭan thung.

Newcastle pawhin Sheffield United 8-0 a sawptute aṭangin player 10 zet an thlak a, goalkeeper Nick Pope chauhin bul a ṭan nawn. Chutihrualin player thar Sandro Tonali leh Tino Livramento bakah kum 17 mi Lewis Miley te chu bul ṭantu zingah an tel.

Goal khat a tawk

Man City-in chance an nei hmasa zawk a, Julian Alvarez-a ball pet chu Pope-a'n a ke hmangin a dang ṭha hle. Pep Guardiola nauten ball an chang tam zawk a, an goal bawh pawh a na zawk.

Amaherawhchu mamawh hunah Alvarez-a'n mawhphurhna a la zo lo a, tlarhmaa goal chance hlahtu langsar a ni zel. Corner kick aṭang pawhin Gvardiola-a'n a tauh goal teuh viau bawk.

Mahse, Newcastle-in chance an neih ang ho erawh a hlauhawm thung. Jacob Murphy-a'n keeper Stefan Ortega chauh a hmachhawn hnuah a ti goal lo. Second half-ah Magpies an insiamrem a, awmze neiin goal an nawr tawh.

Murphy leh Joelinton ten City tlarhnung an ṭhiat a, Brazilian midfielder cross ṭha chu Alexander Isak-a'n harsatna nei loin minute 53-naah a khung. City-in bench aṭangin Jeremy Doku, Matheus Nunes leh Phil Foden te an luhtir a, goal an mamawh avangin an goal nawr na bawk mah se goal an khung thei lo. Newcastle 1-0 in an chak a, League Cup aṭangin City an pet chhuak.

Howe a lawm

Magpies manager Eddie Howe chuan, "Inkhel kha chi hnihin a ṭhen theih. First half-ah City an chungnung a, chutihrualin goal kan venghim ṭha ve bawk. Second half-ah kha chuan goal nawr kawngah leh venhimkawngah kan che ṭha," tiin inkhelh banah a sawi.

Newcastle hian kum 68 chhung nomawi an chawi tawh lo a, League Cup hi nomawi chawi theihna tura chance ṭha berah a ngaih theih. Chutihrualin Magpies hian Premier Leauge leh FA Cup bakah Champions League an khel tih hriat a ṭha.