Kan tan bul ṭanna a ni - Poch

Match thum zet inelna hrang hranga a zawna an chak zawh loh hnuin Chelsea chuan hnehna an chang ve ta a, League Cup third round-ah Brighton & Hove Albion chu 1-0 in an hneh. Inkhelh zawhah Chelsea boss Mauricio Pochettino chuan an tan bul ṭanna a nih a beisei thu a sawi.

Tun season Premier League-ah Chelsea hian match ruk khel tawhin vawi khat chiah an la chak a, vawi hnih draw neiin vawi thum an tlawm - an match hnuhnung berah Aston Villa chu 1-0 in an ngam lo a, kum khat chuang awrh chhunga bazar nana pound tluklehdingawn chuang sengtu hi fiamthu thawh nan an hmang.

Nilaini zan League Cup-ah erawh thawnthu thlak danglamin a awm ve ta a, Chelsea an chak ve ta - goal khung harsat vanga sawisel hlawh Nicolas Jackson chuan Blues tan inkhela goal awmchhun hi a khung a, an hneh hi Brighton ber kher an nih avangin an lawm a zual ang.

Chelsea hian Brighton aṭangin keeper Robert Sánchez leh midfielder Moisés Caicedo chu tun nipuiah khan an lei a, season hmasa khan Marc Cucurella chhuhsakin Spanish fullback hi an la kawl a, an coach chuhsak Graham Potter erawh an ban tawh thung.

Blues hian Brighton hnenah hian player leh coach lakluh nan £225mtd bawr vel an pe tawh - an mikhual lakah hian tlawm leh ngat se chuan, sawisel an tawk nasa lehzual dawn tih a chiang a, chak an mamawh. An mamawh ang ngeiin an chak a, an thaw huai ang!

Chelsea coach Poch chuan, "Zanina kan hnehna chan hi kan tan bul ṭanna a nih kan beisei a, a nih ngei a ngai bawk. Thil ṭha tam tak hmuh tur a awm a, ka player-te khan an theihna sang ber pek duhin theihtawp an chhuah tih kan hmu a ni," a ti a, a lawm hle.

Blues lawmna belchhah turin Chelsea goal Jackson-a khung hi Cole Palmer-a siamsak a ni - Manchester City aṭanga £42.5mtd-a an lei midfielder hian Blues-in an lei chhan a pholang a, Chelsea tana bul a ṭan hmasak berah a khel ṭha takzet.

Poch chuan, "Cole hi player talent nei ṭha tak a ni a, hnehna kan chan nan a thawhhlawk hle. A kum a la nau deuh a, he club-a insiamrem tur hian hun a la duh. Team-ah mai ni lo, club leh he khawpui ngeiah pawh insiamrem turin hun a la mamawh. A ṭhatzia kan hmuin ka hria," a ti a, a player thar lakah beiseina a nei sang hle.

Match thum zet a zawna goal an khung loh hnuah Chelsea-in goal an khung ve ta a, Thawhṭanni zanah league match khel turin Fulham an lenchilh zui dawn - Poch-a sawi angin Brighton hneh hi result ṭha nei tura an bul ṭanna a nih fan-ten an beisei ang.