India-in medal lak belh

Asian Games 2023 neih laiah India chuan medal a lak belh zel a, nimin tlai thlenga medal a lak tawh zawng zawng chu 22 a tling tawh a ni.

Nimin khan Roshibina Devi Naorem-i chuan hmeichhe wushu 60kg huangah silver medal a la a, gold medal inchuhna inkhelah tualchhung mi Xiaowei Wu chu 2-0 in a ngam lo, kum 2018 khan Asian Games-ah tho hian pahnihna dinhmun a lo luah tawh bawk.

Roshibina Devi chuan, "Hlawhtlinna kan chan lai pawh hian kan state Manipur chu ka rilruah a awm reng, mi tam tak rilru thlabar leh hrehawm ti takin an la awm a, chung mite chuan zalen leh hlim takin an nun hmang leh thei se ka duh.

"Khawvel hmuha ka din lai hian ka chi leh kuangte harsatna hi sawichhuah ka duh, a nihna takah chuan Asian Games zawh hunah hian khawiah nge ka haw dawn tih pawh sawi a harsa," tiin a sawi.

Asia ram hrang hrangte inelna khawmpui lianah hian India chu pasarihna a ni mek a, a thlengtu leh hmahruaitu ni mek China chuan gold medal ringawt pawh 76 an la tawh a, medal an lak zawng zawng chu 140 a tling tawh a ni.