Asian Games Football: Saudi ngam lotu India an tla

Asian Games football round of 16-ah nizan khan India chuan Saudi Arabia an ngam lo a, Blue Tigers hian an puanthuah telin inelna thlenna hmun China an mangṭha.

Huanglong Sports Centre Stadium, Hangzhou-a inkhelah India hi 2-0 in an chak lo. Igor Stimac-a enkawl team hian first half chhung chu Saudi hi an chelh thei a, mahse, Asian football powerhouse hian second half-ah goal hnih an khung.

Tun hnaia footballer langsar tak tak an lakluh avanga ngaihven hlawh thar Saudi tan Mohammed Marran chuan minute 51-naah Abu Al Shamat-a siamsak chu goal-ah a chantir - Marran hi Al Nassr tana khel mek a ni a, Cristiano Ronaldo te nena khel ho an ni.

Saudi an phur laklawh. Minute ruk a liam a, Marran bawk a inlar nawn a, senior team tan pawha inlan phak Al Nassr forward hian an goal hnihna a khung zui. Hun tawp thlengin goal dang a lut lo a, India an tlawm.

Blue Tigers tan hian Lalchungnunga chuan inkhel bul a ṭan a, Durtlang tlangval hi a khel tluan - Dinthar tlangval Ayush Chhetri chu minute 63-naah bench aṭanga luhtir a ni bawk.

Asian Games football-ah hian India hian kum 1951 leh 1962 khan gold medal an lo la tawh a, kum 1970-ah bronze lain, kum 1958 khan palina an ni bawk - mahse, tunah chuan thawnthu an chang zo tawh!

Blue Tigers hian group stage-a an match hmasa berah China chu 5-1 ngawtin ngam lo mah se, Bangladesh (1-0) hneh a, Myanmar (1-1) inhnehtawkpui zuiin, table-ah pahnihna niin last 16 an lut a, mahse, Saudi ber kher tawng zuiin, an zinkawng a tawp ta.