Liverpool an 'comeback' leh tawh

Tun season zet chu Liverpool leh 'comeback' a ṭhen hran hleihtheih loh - Nilaini zan khan Reds hian League Cup third round-ah Leicester City chu 3-1 in an hneh a, mahse, hnehna chang turin 'comeback' an mamawh.

Leicester hian Kasey McAteer hmangin goal hmahruai an khung a, mahse, Reds hian Cody Gakpo, Dominik Szoboszlai leh Diogo Jota te hmanga chhangletin hnehna an chang.

Liverpool hian tun season inelna hrang hrangah match riat khel tawhin tlawm an la nei lo - chutihrual chuan heng zinga match rukah hian goal an chhuah hmasa vek a, Jurgen Klopp-a tan hnathawh tur a la awm tih a lang. Inrinni zan Premier League-ah Tottenham Hotspur an lenchilh dawn.

Barakhaih

Anfield-a inkhelah Foxes-in goal an khung hmasa zawk a, season duhawm tak hmangtu McAteer chuan tun season match riata a goal ngana ni turin Liverpool lakah goal hmahruai a khung - minute thumna chauh a ni.

Liverpool hian si phurh an sut lawk lo a, goal dang lut loin chawlhlawk an hmang. Mahse, second half ṭan aṭanga minute thumnaah Gakpo a inlar a, tawih zetin Liverpool si phurh sutna goal a khung.

Gakpo goal khung siamsaktu hi midfielder Ryan Gravenberch a ni - Gakpo vanneih zan ni se, goal tam zawk khung thei a ni. A khung ngei tura ngaih Liverpool academy chhuak Conor Coady-a'n goal line aṭanga a lo dang hmante kha a ui khawp ang.

Number 8

Liverpool-in an duhtawk mai lo - Steven Gerrard-a hak hlui, number 8 hatu Szoboszlai chuan innghahna tlak a ni tih pholangin goal mawi zet a khung a, hun tawp nan minute khat a la awm tihah Jota chuan a belhchhah bawk.

Goal mawi bik khungtu Szoboszlai chuan, "Ka tan chuan goal danglam bik a ni a, ram leh RB Salzburg tan pawh goal ṭha tak tak ka lo khung tawh a, ka goal khung tawha ṭha ber a nih leh nih loh chu ka sawi thei lo - a ṭha ber zinga mi erawh a ni chiang e," a ti.

Liverpool manager Jurgen Klopp pawhin a player hi fakin, "Kan training ho hmasak ber aṭangin mi danglam bik a ni tih ka hria. Ball pet hun ka hrilh a ngai lo a, kei aiin a hre zawk. Player ṭha tak a ni a, goal ropui bik a ni," a ti a, a number 8 chuan a lung a dum hle.